Ramdang in a tlung mi sisehlaw cu zeitin dah a si hnga?

Nihin ni caah bupi nih a kan thimpiakmi cathiang (Matt 13:54-58) kan zoh tikah Jesuh Khrih cu a rak um tawnnak Nazareth khua mi hna nih an zumh lo nak kong a si.

Khuadang ramdang ah fimthiamnak a cawngmi si hna seh, ramdang in a rak tlung mi si hna seh hmuh tikah upatnak pek le cohlaan cu a fawi ngai mi a si tawn. Sihmahsehlaw nifatin hmuh lengmang mi hna, an tuahkel mi rian konglam zong theih ko mi hna nih ruah lo piin cawnpiaktu saya dirhmuh in an hun langh a si ah cun cohlaan khawh ding a har mi a si ko. A si taktak kho hnga maw? tiin lungawttawm nak kan ngei cio ko men hna lai.

Nihin kan theih mi cathiang chung Jesuh sining zong hi bangin a si ve ko. Farasi mi hna bangin cawnnak rak ngei ve sehlaw Nazareth khua mi hna nih a bia an rak cohlaan khawh deuh ko lai. “Hi bantuk fimnak hi khoika ah dah a vaa lak hnga? Hi bantukkhuaruahhar tuahnak zong hi khuazei jin dah a hmuh hnga?” tiin Nazareth khua mi hna nih an ti. Zeicah kan ti a si ah cun Jesuh Khrih cu an mithmuh te ah an sin in a rak tthang mi a si caah na hmuh mi le an theih mi khuaruahhar nak hna hi an zumh khawh lonak a si. Cun kutzung thiam (lettamaa)pakhat, mi sawhsawh sining hmuh in an rak hmuh caah a si fawn.

“Zumhnak an ngeih lo caah cuka ah cun khuaruahharnak tampi a tuah lo”(Matt 13:58) tiah a ti. Zumhnak a um ti lo a si ah cun zeibantuk khuaruahhar nak hmanh tuah len zongah cohlaan khawh a si ti lo. Cohlaan duh lo nak hmun ah cun zeihmanh chap khawh a si lo i remh khawh zong a har cang. Rianttuan ttinak zongah zumhawktlak sining dirhmun a biapit ning hi theih cio ding a si.

Pathian cungah zumhnak a ngei mi hna nih tlang aa thawnmi an hmuh a si ah cun “Pathian thawngin a si” an ti ko lai i, zumhnak a ngei lomi hna nih cun “Lii aa hninh ruangah aa thawn mi a si” tiah an ti ko lai. Zumhnak nih hin khuaruahhar nak thil a chuahter i khuaruahhar nak thil nih hin zumhnak a fehter chin tawn.