Rawh hmasat a herh

“Biatak kan chimh hna: facang ci pakhat cu vawlei ah tuh a si i a thih ta lo ahcun pakhat lawng a si peng ko. A thih ta lawngah facang mu dang tampi a chuahter khawh”(Jn 12:24 )

Nihin August 10 ni cu mithiang deacon Lawrence martyr dirhmun in a thih ni a si. A biak i a zumhmi Jesuh Khrih caah le a biaknak phung ruangah thih daan pek a si ko nain zeibantuk ttihphaannak hmanh ngeih loin siang ngaiin a Bawipa caah a nunnak kha aa rak pek. Kan nih Khrihfa a si mi hna nih hin teh harsatnak tlawmpal kan ton tikah lungdongh in kan biakmi kan Pathian le kan zumhnak kan kal tak bal ve maw?

Lungcu an den i a kuai hnu lawngah aa dawh mi zukttuh ah chuah khawh a si. Sui cu mei in an titter i remh a si hnu lawngah hruk oihding caah aa dawh mi thil ah a hung chuak kho. A tlok cuahmah mi ti chungah facang cu an paih hnu lawngah ei ding rawl ah a hung cang kho. Vawlei cung ah a tla mi thlaici zong a rawh hnu lawngah a let in a thei an tlai kho ve. Hihi Pathian sermi kokek thil sining hna an si.

Temh innak le thihnak ing in vawlei mi vialte nunnak thar a kan petu cu Jesuh Khrih a si. Mithiang mi hna nih an thisen luanh in Jesuh Khrih tehte an rak khaan ruangah bupi zong nihin ni tiang in a tthancho i a karh chin lengmang. Ram le miphun caah hruaitu hna nih an thisen an luanh nak thawngin ram le miphun hna nih humhimnak an hmuh ve.
Hi vawlei he aa pehtlai mi nunnak cu chikhat te lawng a nguhmi a si. Sihmanhsehlaw a rawk kho lomi zungzal nunnuamhnak kan pek hna lai tiah bia a kan kamh tu cu Jesuh Khrih lawng hi a si.
Cuasicaah zungzal nunnuamhnak bia a kan kamhtu Jesuh Khrih caah tehte ttha si ve cio hna u sih.