Rawl kung le Belh

Rosy timi nu te nih facebook chungin thawng pang pakhat a hmuh mi kong a hawinu Emily sinah hitin a chim: “Zei ruangah hme Bupi chungah hin thangchiatnak lawng a kawl mi minung hi an um peng ve hnga; khuaruahhar taktak a si” tiah a ti. Emily nih cun, “ Jesuh Khrih hrimhrim nih a thimmi zultu 12 chung hmanh in hme pakhat nih a rawi ve ko kha; hi tluk minung a tammi bupi chungah hin rawitu pakhat hnih an um cu khuaruahhar awk zei hme a um ” tiah a leh. Nihin kan theih kan rel mi cathiang (Matt 13:24-30) chung i Jesuh Khrih nih tahchunhnak bianabia a chimmi ah Vancung Pennak kong hi vancung ram kong a si lo.

Vawlei cungah dirh mi Pennak kong a si. Cucu Bupi kong kha a chim duh mi a si. Bupi cu thazang a dermi minung hna in dirhmi bupi a si caah bupi chungah hin a palh mi, a sual mi le hna hnawhnak a chuah pi tu tete hi cu an um peng ko lai. Facang kung le belh i cawh in an keuh bangin mitha mi hna le mi thalo mi hna zong hi vawlei cungah hin cawh thup in um a si peng ko. Vawlei cungah miding mittha tampi an um bangin mi hrokhrol hna zong tampi an um ve len ko. Zeihmanh khuaruahhar ding a um lo. Hi sining vialte hi Jesuh nih a hmuh cia dih mi a si caah kan lung a rawh sual nak hnga lo ding caah ralring tein um thiam ding in a kan cawnpiak mi a si ko. “Cuticun vancung khua i a ummi nan Pa fale cu nan si lai. Anih nh cun a tthami he a ttha lomi he, an cungah a ni kha a tlanter , tthatnak a tuahmi he tthat lonak a tuahmi he, an cungah a ruah kha a surter”(Matt 5:45) tiah a ti. Pathian nih cun a sermi minung kan si caah aa tluk tein a kan dawt dih cio ko. Biaceihtu Bawi a si mi Pathian hmanh nih aa tluk tein a kan dawt ko a si ah cun kan mah hna nih “a nih cu mi sual a si ee, khamh a si lai lo ee” tiin biaceihna nawl kan ngei lo. Caan dongh tikah bia a kan ceih dih cio tu ding cu Pathian pakhat lawng a si(Matt 13: 30).

Interview pakhat ah Pope Francis nih bia an hal mi a leh mi hna cu cinken awk ttha ngai a si: “Tupi chungah thingkung khat tthup in zeitin dah an hun tthan timi a thawngpang pakhat hmanh kan thei kho lo nain, thingkung pakhat a kiah i a tluk mi thawng cu tupi dihlak in a thang kho” tiah a ti. Midang tthatnak hmuh piak thiam nak in an chiat nak kha hmuh a fawi deuh peng tawn. A tlu mi thing kung pakhat ruangah lung rawh loin dawh te le kiak loin a tangmi thing kung tampi an um ko rih bantukin bupi chung zongah hnahnawhnak a petu pakhat hnih ruangah ngaihchiat loin, thianghlim tein le Pathian duh ning in a ummi Bupi chungah tampi an um rih ko tiin thazang tu kan i lak zungzal ding a si. Rawl kung le belh cu tthang tti rih ko hna seh.

Add new comment

13 + 4 =