Rawl Ulh Taktak

Lenglei mithmuhnak in le langhnak in minung pakhat khat khi a thianghlim ngaimi minung a si tiah kan ti kho hna hnga maw? An zulh mi phunglam hna le an dirpi mi phunglam hna zoh in teh miding mifel an si tiah kan ti kho hna hnga maw? Ti kho naisai hlah. Zeicah tiah cun lenglei in a langmi nih hin chunglei sining vialte hna kha tling cikcek in a langhter khawh lo caah a si. 

Pumhnak ah aa tel pengmi hna le biakinn a phaan peng tiah ruahmi hna zong khi a thianghlim cikcek mi an si tiah kan ti kho hna lai lo. An sining an tuahser nak hna le an lungput hngalh khawh deuh nak hnga ding caah ṭha tein hlathlai zong a hau men lai. Minung cu lenglei sining zoh in bia khiahpiak khawh dingmi a si lo. “Tam deuh hlathlai ah cun tam deuh theih a si” timi cu aho paoh nih kan theih cio mi si caah theih kan duhmi hna kong kha cu tam deuh in le ṭha deuh in hlathlai ding hi a herh ko. 

Nihin ni Missa thawinak caan ah kan relmi cathiang (Luke 5:33-39) chungah Farasi mi hna le phungbia cawnpiaktu saya hna nih Jesuh bia an hal nak kong kan hmuh. “Johan zultu pawl cu atu le atu rawl an ul i thla an cam, cun Farasi mi hna zultu pawl zong nih khan cu bantuk ṭhiamṭhiam cun an tuah; sihmansehlaw nang na zultu hna cu an ding an ei ko,” tiah an ti. Minung sawhsawh a simi Farasi mi hna nih Pathian Fapa Jesuh kha an mah sining level nak niam in an zohchuk i tuahsernak lei in anmah sining hna he tahchunhnak bia an chimmi a si. Jesuh nih a leh mi hna cu: “Nupi ṭhit rawl danghnak ah, nupi ṭhitupa cu an sin i a um chungah khan sawmmi hna cu rawl ulhter awk a si, tiah nan ruat maw? Nan ruat hrimhrim lai lo. Sihmanhsehlaw nupi ṭhitupa an sin in a chuah caan kha a phan ko lai i cu tikah cun rawl cu an ul te ko lai,” tiah a ti hna.

“Rawl ulh in thla a cam” timi cu a ṭha tuk mi a si ko. Sihmanhsehlaw sual nak tuah i sum khawh ṭung lo, bia ṭhalo chim i sum khawh ṭung lo, tbk… a si ahcun zei dah a ṭhathnemhnak a um hnga? Santlaihnak a um lo. Zeicah tiah cun a tuahsermi “Rawl ulh thlacamnak” nih amah le mah hmanh a thlen khawh ṭung lo ah cun zeitin dah Pathian duhnak le programe hna cu a tuah khawh/ a zulh khawh hna lai? A rawlulh thlacam nak le a tuahser nak hna nih amah kha a thlen hmasat a hau. 

(Isaiah 58:3-7) -  Bawipa nih a thawh hna i, “Rawl nan ulh pah ah pei nanmah duhnak kha nan kemh chih i nan rianṭuantu kha nan hrem hna cu. Nan puarhrang zungzal, ann i vel, nan i si lengmang. Hi bantuk rawl ulhnak nih hin nan thlacamnak cu a ka ngaihter lai, tiah nan ruat maw: rawl nan ulh tikah nanmah le nanmah sifah nan i pe, nan lu cu ram hnah bantukin niam tein na khun i bawhnak caah khumpuan nan phah i a cungah vutcam nan phulh. Cucu maw rawl ulh nan timi cu a si? Cu nih cun a lung a ton lai ti ah maw nan ka ruah?

Ka duhmi rawl ulhnak cu hihi a si: Hremnak cikcin kha chat hna u law dinlonak hngawngkual kha phoih hna u law hremmi kha luaṭer hna u. A rawl a ṭammi kha nan rawl hrawm hna u law inn ngei lo misifak kha tlun inn onh hna u. Aih awk a ngei lomi kha thilpuan ṭhen hna u law nan sahlawh le nan rualchan hna kha bawm loin um hna hlah u. Hihi ka duhmi rawl ulh phun cu a si.”