Rianṭuantu men kan si ko

72 kha thanuam ngaiin an ra kir i, “Bawipa, nangmah min in kan ṭhawl hna tikah khuachia hmanh nih kan nawl an  ngaih,” an ti. Jesuh nih a leh hna i, “Sihmanhsehlaw thlarau ṭhalo nih nan nawl an in ngaih hna caah khan i lawm hlah u, vancung i nan min ṭial a si ca tu ah khan i lawm tuah u,” a ti hna. (Lk 10:17,20)

Zultu 72 hna an khualtlawnnak in an rak phanh ṭhan tikah an khualtlawnnak i an tonmi thil sining vialte konglam he pehtlai in zultu hna nih lungtho ngai in Jesuh sin ah an chimhnak kong le Jesuh nih a zultu hna kha an i lawmh taktak ding cu zeidah a si timi kong a chimh hna nak kha nihin ni caah Bupi nih a kan thimpiakmi cathiang (Lk 10:17-24) a si. 

Zultu hna nih an chimmi vialte Jesuh nih ṭha tein a ngaih piak dih hna hnu ah a chimmi cu: “Sihmanhsehlaw thlarau ṭhalo nih nan nawl an in ngaih hna caah khan i lawm hlah u, vancung i nan min ṭial a si ca tu ah khan i lawm tuah u,” (Lk 10:20) tiah a ti hna. Cun hi thil ti khawhnak vialte hna zong hi Pa Pathian sinin a ra mi a si timi zong kha a chimh hna. “Asi, ka Pa, hi thil na tuahnak cu nangmah duh tein le nangmah nih naa thimning tein a si ko.”(Lk 10:21)

Zei ruangah dah Jesuh nih a hnu zultu hna kha an minung sining in thil an tuah khawh mi hna cungah i lawmh tuk lo dingin ralrinnak a pek hna hnga? Minung cu thil kan ti khawh mi tlawmpal te cung hmanh ah khin ruamkai nak lungthin a ngei kho mi kan si caah a si. 

Zultu hna bangin thlarau rianṭuantu pastor le cawnpiaktu saya hna zong nih phung an chim i thlarau tampi a tlaih khawhnak cung zongah zeihmanh i uah pi ding a um lo. Pathian i a rian thiang ṭuan te lawng a si ko. Kanmah nih sunparnak le thangṭhat co ding zong zeihmanh a um lo. Pathian ca lawng te an si timi kha fiang tein thieh ding a si. Cucu Khrihfa a simi paoh nih kan theih ding zong a si. 

Midang hna nak in thlacam ka ṭhawng deuh, Bible ka rel kho deuh, kaa pum kho deuh, Missa ka kai kho deuh timi lungput ngeih lo hrimhrim ding a si. Thil ti khawhnak thazang a kan petu le a rian kan ṭuanpiak mi Pathian lawnglawng nih thangṭhat nak le sunparnak, conglawmhnak a co ding a si. A kan auh mi cu a rianṭuan ding ca lawngah a si. Tangdornak lungthin he rian a kan fialtu Pathian kha ṭha tein a nawl kan ngeih zungzal ding a si.