Rian ṭuan ṭinak

Photo Credit

“Cu ka khua i a ummi mizaw kha va damter hna u law, cuka khuami hna cu, ‘Pathian Pennak cu nan pawngte a phan cang,’ tiah va chim hna u.” (Lk 10:9)

Nihin Missa raithawinak chungah rel dingin le thazang lak ṭi dingin Bupi nih a kan thimpiak mi thawngṭhabia thiang cu Luke 10:1-9 a si; Bawipa nih thawngṭhabia phuan dingin a zultu hna pahnih cio in a thlah hna nak kong a si. Jesuh nih a kal lainak ding “khua le hmun paoh ah khan a  zultu hna kha a hmaiah pahnih pahnih in ” a thlah cia hna. Hi zawn ah hin ruah ding mi le hmuh ding a si mi cu “Vancung Pennak, Pathian Pennak cu minung pakhat ca lawng a si lo. Mi vialte caah tinhmi a si” timi kha a si. 

Pathian thawngṭhabia phuannak zongah mah thil ti khawhnak lawngin a za lo. Cun mah le mah lawng i rinh ding zong a si lo. Bawmtu kan herh, Jesuh kan herh timi zong theih ding a si. Bupi chung rianṭuannak ah hin mah lawng tein a dang tein ṭuan khawh mi rian an um lo. Jesuh nih ṭuan dingin a kan fial mi rian cu pakhat le pakhat i pehtlaihnak le i bawmhnak lawnglawng in ṭuan khawh ding mi rian a si. Zeicah tiah cun “Khamhnak rian” a si caah a si. One man show a ngah lo. Cun ṭih a nung tukmi rian zong a si. “Nannih cu cenghngia lak i tuufa thlah bantukin kan thlah hna,”(v3) tiin Jesuh nih a ti fawn. Mah lawng tein ṭuan ding ah cun a him lo mi rian a si. Pakhat le pakhat i bawmh a herh. Cun rian ṭuan dingin a kan thlahtu Jesuh he zong cat loin i pehthlaih nak tuah zungzal ding a herh fawn rih.

Khrihfa mi vialte hna nih Bawipa thawngṭhabia phuan dingin rian kan ngei cio. Kanmah le kan si khawh ning cio in Pathian bia thiang tehte khaan ding le nunpi ding a si. Jesuh nih: “Nan sin ah a zungzal in, caan dongh tiangin ka um lai” (Matt 28:20) tiah a kan ti bangin rian kan ṭuannak ah zeihmanh ṭih ding a um lo. A kan umpi tu le a kan bawn zungzal tu ding Jesuh a um ko. Mah fimnak, ṭhawnnak le thil ti khawh nak cung lawngah i bochan loin Jesuh hrimhrim he i komh in, cun Khrihfa dang hna he i fonh in Pathian rianthiang ṭuan ding a si.  

Add new comment

8 + 6 =