Rualremnak

“Hi vawlei cungah hin, nan halmi thil kong ah, pahnih nan lung aa khah ahcun, nan halmi thil cu vancung i a ummi ka Pa nih an pek hna lai. Zeicahtiah ka min in pahnih pathum nan i pumhnak ah kei zong nan sinah ka um ve,” tiah a ti.(Matt 18:19-20)

Hawikomhnak, pehtlaihnak(relationship) timi cu minung kan nunnak ah hin a biapi tukmi a si. Pehtlaihnak a rawh sual a si ah cun daihnak a um ti lo caah remh tthan ding a har mi thil a si bantukin rak i theih palhnak vialte hna zong kha fianh tthan dih an hauh caah tthat lonak thil hna an hun chuah hlaan ah hin kan i dawtnak hna le kan i komhnak (daihnak)hna kha ttha tein kan kilven ding a si.

Nihin ni caah bupi nih a kan thim piak mi cathiang cu (Matt 18:15-20) a si i a tlangpi in kan zoh a si ah cun pakhat le pakhat i hawikomhnak le i pehtlaihnak ah hin kan i ralrin ding mi hna hi an si. Pehtlaihnak a rawh sual a si ah cun remh tthan ding a har ning, hawikomhnak ngeih khawh tthan nak hnga ding caah i zuam ding timi hi Bawipa nih a kan cawnpiak duh mi a si.

Minung cu Pathian sin in fimthiamnak laksawng aa dang cio in a hmu mi kan si. Khua a ruat kho deuh mi an um bangin thil a tuah kho deuh mi zong an um. Thazang in rian a ttuan kho deuh mi an um bangin thluak in rian a ttuan kho deuh mi zong an um ve. Ramkel lei he pehtlai in pum aa pe mi an um bangin Pathian ram caah le thlarau lei caah tiin nunnak aa pe mi zong an um ve hna i kan sining cio hna le kan i thimmi lam hna hi an i dang cio.

Zeitlukin kan sining hna le kan i thimmi lam i dang hmanhsehlaw a kan sertu Pathian nih kan zeizong vialte hi tthatnak caah hmanter a kan duh nak ah hin aa khat dih. Kan chim kan relnak ah siseh, kan tuah sernak ah siseh, phu aa then tu le lung tuainak a chuahter tu kan si lo ding hi a herh mi a si. Minung hna caah tthatnak a chuahpi tu kan si khawhnak hnga ding caah kan sining cio in kan dirkamh cio ding a si.

Zeicah kan ti a si ah cun daihnak, dawtnak le rualremnak hna cu minung kan tthancho nak le kan nunnak caah a biapi tukmi a si caah a si. Pakhat le pakhat i dawt ding le i pehtlaih ding, i kilven ding i zohkhenh ding hi Jesuh nih a kan duh piak mi le a kan cawnpiak mi zong a si.

Kan nunnak ah remnak a sertu maw kan si, buainak a chuahter tu dah? Remnak a kilkawi tu le a nunpi tu maw kan si, a hrawk tu dah kan si timi hi ruat cio hna u sih. I rualremnak cu teinak hrampi a si.