Ruat Cio Hna U Sih!

Nikhat cu kum (93) a si cang mi tarpa pakhat ruah lo piin a lungmit i lampi ah a tlu ti si. Tarpa a tluk a hmu mi nih a ran khawh chungin sizung lei ah an kalpi colh i cu tarpa cu sibawi te nih an rak thlop piak. Tarpa sizung a phanh bak in Suimilam (24) chung oxygen an rak bunh piak. Cu hnu lawngah tarpa cu a hun i hlau i a lung a hung fim than.

Tarpa nih cun sibawipa cu a dih mi phaisa zeizat a si kha a hei hal. Sibawipa nih cun catlap pakhat aa rak i put i tarpa cu a hei pek. Tarpa nih cu catlap cung i a dih mi phaisa 500,000MMK kha a zoh i a mitthli a tla i a tap ti si. Sibawipa nih cun tarpa cu a dih mi phaisa ruangah na ngeihchia hlah tiin a hei hnemh.

Sihmahsehlaw, tarpa nih a leh mi cu, “A dih mi phaisa ruangah ngaihchia in ka tah a si lo, keimah tein kaa pek khawh dih ko.  Ka ttahnak sullam cu, oxygen hi suimilam 24 chung lawng ka hman ko nain phaisa 500,000MMK ka dih. Sihmanhsehlaw, Pathian nih a rak ka pek mi thli-thiang caah zeihmanh pe loin ka rak dawp hi kum 93 a si cang. Zeizat rengruang dah Pathian sin ah lei baa ka ngeih hnga?” tiah sibawipa cu a leh.

Cutin Tarpa nih a chim mi cu sibawipa nih a theih tikah, a lu aa kun i a mitthli a thlak ve ti si.

Hi ca a rel mi kan dihlak nih ruah kan herh mi cu,  nihin ni tiang Pathian nih a lak in a kan pek mi Thluachuah, thli-thiang kan dawp cio kan hman cio ko nain a man zeizat dah kan pek ve bal. Lunglawmhnak bia tal tah kan chim bal hna maw? Pathian sin thla kan cam tikah Pathian nih a lak in a kan pek mi nunnak Thluachuah, Veel vialte hna ruangah “Maw Bawipa Pathian, Na Veel-Thluachuah ruangah kaa lawm tuk hringhran” timi bia te hi chim thiam ve cio u sih.