Ruat ve Hmanh

Photo Credit

“Nan chaw a umnak ah nan lung zong a um ve” (Matt 6:21)

Chawva, tangka, thilri hna le inn lo dawhdawh hna nih kan dawt tiah a kan ti kho maw? Ti kho nemmam hlah. Zeicah kan ti a si ah cun a hmun lomi thil an si caah a si. Minung cu a kan dawtu hna kha a caan caan ah philh kan hmang tawn hna i, kan dawt tiah a kan ti kho lomi thilri chawva hna hnu lei tu kha heh tiah zulh in dawi a hmang mi kan si. A parpavuan in an i dawhnak le duh an nunnak lawng kha kan hmuh caah a si. Thlarau mit in kan zoh thiam hna lo caah a si.

Pathian lawnglawng hi a kan daw cikcek tu cu a si. Johan thawngthabia chungah: “Cucaah Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai,” tiah a ti (John 3:16).

Nihin ni caah Bupi nih ruah ti dingin le thazang i lak ti dingin a kan thimpiak mi cathiang chungah “Rungru le cirik nih an ei khawh i mifir nih an bauh i an fir khawhnak vawlei ah hin nan chaw va khong hlah u. Rungrul le cirik nih an ei khawh lonak le mifir nih an bauh i an fir khawh lonak vancung tu ah khin nan chaw cu va khong u. Zeicahtiah nan chaw a umnak ah nan lung zong a um ve lai,” tiah a ti (Matt 6:19-21).

Taksa lei in aa daw mi hna hmanh nih an dawt mi hna kha an philh kho hna lo, an kong an ruah theu tawn hna. Taksa le thlarau a kan petu le a kan sertu Pathian chinchin nih cun zeitluk in a sunglawi mi dawtnak in dah a kan dawt timi kong kha (John 3:16) chungah kan hmuh cang. Chungkhar pakhat le pakhat kan i dawt bangin le hawikom pakhat le pakhat kan i dawt bangin Pathian kha dawt le ding philh lo ding a si. Kawl phungthluk ah “mithi cu a rauh hnu cun philh an si tawn ko” tiah an ti bangin vawlei cung kan i dawtnak hi cu a lo tlau kho mi a si. Vawlei cungah kan dawtmi hna nih siseh tiah a kan duh piak ning in nun khawh kan i zuam a si ah cun vancung khua i a ummi kan Pa Pathian nih si hna seh tiah a kan duh piak bang khan kan nun chinchin ding a si.

“Mit hi pum caah meiinn a si. Nan mit a that ahcun nan pum cu a dihlak in ceunak in a khat lai,” (Matt 6:22) tiah a ti bangin thlarau mit in zeizong vialte hna hi kan zoh thiam hna an si ah cun Pathian dawtnak le sunpar lianngannak hna kha fiang chinchin in kan hmuh khawh ko hna lai.

Na umnak inn khaan chungah siseh, na pawngkam ah siseh naa chiah mi thilri hna le a ummi hna kha tha tein zoh hna law Pathian sin an phanh pi hnga dingmi thilri an si hna maw timi kha ruat hmanh.

Add new comment

7 + 3 =