Sabbat ni ah

January 20, 2020 (Wed)

“Kan Phung nih Sabbath ni ah zei tuah dah a kan onh? Ṭhatnak nan tuah lai, a ti maw ṭhat lonak nan tuah lai, a ti dah?”

Khrih ah dawtmi nu le pa, u le nau hna, nan dih lak cuang ah ngandamnak, lunglawmhnak, hnangamnak le pakhat cio i nan hrehmi thluachuah Pathain nih in pe cio ko hna seh tiah a hmai sabik ah thla kan cam piak hna. Nihin January 20, 2021 (Cacawn Nithum) i kan rel hngami Bible hna zoh in thlarau thazaang la ṭi hna u si tiah kan sawm duh hna. Kan rel hnga mi Bible hna cu a veikhat relnak ah Hebru 7:1-3, 15-17 tiang, Salm 110:1-4 tiang le Marku 3:1-6 tiang hna an si.

A veikhat relnak le Salm chungah Siangbawi hna Ordination caan i kan theih tawn mi “nang cu Melkhizedek tlangbawi sining zulh in tlangbawi na si zungzal lai” timi kong kan hmu kho. Melkhizedek kong Bible chungah kan zoh a si ah cun a mah cu tlangbawi dang he an i lo lo. Nihin first reading i kan hmu kho mi cu, ‘Melkhizedek cu daihnak tiih sullam a ngei mi Salem Siangpahrnag a rak si i Cungnung Bik Pathain i tlangbawi a rak si. Melkhizedek hi kan Lai Bible ah cun a nu siseh, a pa siseh, a hringsortu hna zong siseh, a chuahnak le a thihnak kong zong siseh ṭialmi a um lo. Amah cu Pathian Fapa bantuk hi asi i zungzal in tlangbawi a si ko, tiin ṭial a si. Mirang ah cun a chungkhar kong ṭialmi a um lo ti siloin ‘pa siseh, nu siseh, pi le pu siseh a ngei lo, a thoknak le a donghnak zong a ngei lo i Pathian Fapa bantuk a si tiin an ṭial.  Bawi Jesuh zong cu Melkhizedek bantuk tlangbawi dang a si ti zong kha kan hmu kho. Chim duh mi cu nu le pa, pi le pu hna tlangbawi phun si ruang i tlangbawi sive ti bantuk a si lo. Hlan lio ah cun a tlangpi in kan zoh a si ah cun tlangbawi hna cu Levi tefa sih a hau. Natein Bawi Jesuh cu Melkhizedek bantuk a si i miphun ruang i tlangbawi a si lo, Pathian thimnak thawng in tlangbawi a rak si nak a si. A tu kan chan zong ah Bawipa Jesuh tlangbawi a sinak bantuk in kan tlangbawi hna zong hi miphun ruangah siloin Pathain thimnak ruangin tlangbawi an rak si nak a si ve. Levi miphun ti um lo, Mirang, Kawl le Lai ti ban tuk um lo in tlangbawi hna Pathian nih a thim hna.

Cun nihin kan rel hngami Gospel cu Bawi Jesuh nih sabbath ni ah a kut a zengmipa a dam ter nak kong asi.

Marka 3.1-6 ¹Jesuh cu pumhnak inn ah khan a va kal ṭhan i cuka ah cun a kut a zengmipa pakhat a rak um. ²Jesuh cu zeitindah sual kan phawt khawh lai ti a bawhmi kha an rak um i cu hna nih cun Sabbath ni ah hin aho tal a damter hna lai maw ti kha ṭha tein an rak ngiat. ³A kut a zengmipa cu Jesuh nih cun a thawh i, “Hmailei ah hin ra chuak tuah,” tiah a ti. ⁴Cun mizapi cu a thawh hna i, “Kan Phung nih Sabbath ni ah zeidah tuah a kan onh? Ṭhatnak nan tuah lai, a ti maw ṭhat lonak nan tuah lai, a ti dah?” tiah a ti hna. Sihmanhsehlaw bia kaa khat hmanh an chim lo. ⁵Cu tlukin an lung a hah le an palh kha a hmuh hna tikah a thin a hung a ngaih a chia i mipa cu a thawh i, “Na kut kha samh,” a ti. A samh i a dam ai! ⁶Cucaah Farasi mi hna cu pumhnak inn khan an chuak i Herod minung hna he khan zeitindah Jesuh hi kan thah khawh lai, tiah khua an khang.

Kan rel mi Gospel he pehtlaih in nihin ah kan ruah ding ka duh mi cu minung kan sinak ah, minung tam deuh kan umnak ah phunglam, upadi timi hi a hreh tawn. Upadi a um lo a si ah cun mah ruah ning, mah duh ning cio te in kan um lai, kan kal lai i i rem lo nak, buainak, ṭhennak tam pi a chuak fawi te mi a si. Cuasicaah upadi hi ramchung zongah siseh, Bupi chung zongah siseh, community le chungkhar tiang in a herh mi a si. Sihmanhsehlaw mah upati hi zeiruangah an tuah, zeitinak ah timi target kha kan philh i zul kan tim sawhsawh a si ah cun palhnak lam ah zong kan phan kho mi a si ve fawn. Sabbath ni asiloah Pathian ni kha thianter va philh hlah timi Pathian nawlbia asiloah upadi hi Pathian duhning tein dingte le felte in um khawhnak, Pathian sunparnak langhternak caah, thilṭha tuahnak caah ser mi a si. Natein Jew miphun tampi nih mah Nawlbia i a target kha an philh i an lungthin kha Pathian sin phan tiloin phunglam zulnak lawnglawng kha an ruat i an kal ning zong kha a palh dih.

Nihin Gospel ah Bawi Jesuh nih a kut a zeng mi pa a dam ter tik ah mipi nih sual a tuah ban tuk in an hmu. Sabbath ni ah thilṭha hmanh tuah awk a si lo ah an rel cang. Bawi Jesuh kha sual phawt ding lawng te an ruat i an mah i an tuah mi sualnak ngan pi cu an hmu kho ti lo. An tuah mi sualnak nganpi cu zei dah a si?  ‘Farasi mi hna cu pumhnak inn khan an chuak i Herod minung hna he khan zeitindah Jesuh hi kan thah khawh lai, tiah khua an khang,’ ti a si. Sabbath ni ah mizaw dam ter cu sual nganpi ah an ruat i an mah cu Sabbath ni ṭhiamṭhiam ah mi thah an va tim. Bawipa nih “Kan Phung nih Sabbath ni ah zeidah tuah a kan onh? Ṭhatnak nan tuah lai, a ti maw ṭhat lonak nan tuah lai, a ti dah?” tiah a hal tik ah zong zei hmanh an chim duh fawn lo. Mi sual phawt ding lawng kha an ruat.

Khrih ah dawt mi nu le pa, u le nau hna, Pathian Nawlbia siseh Bupi cawn piaknak hna siseh, cun kanmah he pehtlaihnak a ngei mi phunglam vial te zong kan zul tik ah a biapi bik a si mi dawtnak le mi cung i thilṭha tuah nak kha phil lo in a zul kho tu kan si nak hnga zuam cio u si. A zungzal tlangbawi a si mi kan Bawipa Jesuh Khrih he pehtlaihnak ngei in a nung kho peng tu kan si nak hnga zong zuam hna u si. Zeizong tuahkho kan Pa Pathian nih thlua in chuah ko hna seh.

https://www.facebook.com/RVAHakhaChin/videos/246106586916903/

Fr. Peter Lal Zin Thang (Hakha Diocese)