"A si"- "Yes"

Photo Credit: Google Image

Naa theihngalh tukmi na hawi na pawngkam in laak a si tikah, or hmuh ton khawh tthan ti lo nak hmun ah an kal tak tikah zeitluk in dah a si cio tawn? Tu lio zong hi a caan caan te ah cun thawngpang kan theih theo mi “mitlau kong” hi a si. Taan tak chungkhar hna le hawikom hna caah zeitluk in dah thinphang le thla lau in an um cio hnga?

Zeiruangah dah inn lei kir loin Jerusalem ah a taan ta hnga? Prophet Samuel a ngakchiat lio tein Bawipa nih a auh i a bia phuangtu prophet ah a rak thim bantukin; Bawipa zong nih a ngakchiat ka tein a Pa rianttuan ding aa hngalh caah a Pa in ah a tan nak zong a si ti zongin kan ti khawh.An va hmuh tikah a nu le a pa zong an khuaruah a har ve. A bikin ngakchia no te nih biaknak lei hruaitu hna sin tthut in bia a ruah mi hna hrimhrim ah hin an khuaruahhar khun ko lai. A nu nih cun a thawh i, “Ka fa, zeicahdah hi bantukin na kan tuah? Na pa le na nu nih awlokchong in pei kan in kawl cu,” tiah a ti. Annih cu “Zeicahdah nan ka kawl? Ka Pa inn ah ka um awk a si ti kha nan hngal lo maw?” tiah a ti hna (Lk 2:48-49).

Bawipa nih a kan auh tikah a vel a kan pek. A rian thiang ttuan khawhnak hnga ding caah a kan pek mi cungah – “A si”- Yes- ti khawh nak vel a kan pek. Cu vel cu tukforhnak le dawnkhan tu thil vialte hna cungah tei khawh nak vel a si. Bawipa nih na nunnak ah an kawhnak aw thawng na thei kho ve maw? An fial mi rian ttuan khawhnak hnga ding caah a vel he an um pi peng ko timi hi tah na zum maw? Mithiang Paul nih a ti mi cu: “Ka vel hi na caah a za ko, zeicahtiah ka ṭhawnnak cu derthawmnak ah hin a lang,” ti a si. Cucaah cun Khrih ṭhawnnak nih a ka huhphenh ti kha ka hngalh nakhnga, ka derthawmnak ah hin lunglawm tein kaa porhlaw cang. Ka derthawmnak ah siseh, nihsawhnak le harnak le hremnak le temhinnak ka hmuhmi ah siseh, Khrih ruangah kaa lawm ko; zeicahtiah ka derthawm tikah hin ka ṭhawn a rak si (2 Cor 12:9-10)” tiah a ti.

 

Add new comment

9 + 1 =