Siang ngaiin pe ve hmanh

Photo Credit

“Nanmahle nan lungthin nan i thlehning cio in rak tho u, nan thawh tikah i ngaihchih bu le hnekchom in si hlah seh, lunglawm tein a thomi kha Pathian nih a dawt hna.” (2Cor 9:7)

Nihin kan theih kan rel mi Cathiang chung zongah Jesuh nih a zultu hna a thlah hna tikah zei sining dirhmun in dah thawngthabia an phuan lai timi biacahnak kong a si (Matt 10:7-15). Jesuh nih an phuan hnga dingmi thawngthabia a chimhmi hna cu: “Vancung Pennak cu a nai cang, tiah va chim hna u,” tiah a ti. Cun thil tikhawhnak zong a pek hna: “A zawmi kha va damter hna u, mithi kha va thawhter hna u, thinghmui kha va thianter hna u, khuachia kha va thawl hna u.”

Cun zultu hna khual an tlawn tik zongah khingzang tein khual tlawn dingin a chimh fawn hna: “Nan zal ah sui tangka siseh, ngun tangka siseh, dar tangka siseh, i sanh hlah u. Nan khualtlawnnak dingah cun rawl halnak zal siseh, angki khehuan siseh, ke dan siseh, thiangthun siseh, i phorh hlah u. Rian tauntu nih cun a herhmi thil cu a hmuh awk aa tlakmi a si ko,” tiah a ti rih hna. An herhmi eidin hna le tlunnak inn hna zong pek le awnh piak an si ko lai timi zumhnak zultu hna nih an ngeih nak hnga ding ca zongah fek tein bia a cah rih hna. Hitin Jesuh nih a ti hna tikah hin zultu hna an lung chungah zeitin dah a um hnga? Khual an tlawn tikah a herh hnga dingmi thilri cu tlawnpal tal an i put ding a si ko hnga lo maw? Tuchan Pathian riantuantu hna nih hin teh phungchim dingin khualtlawn kan i timh tikah zei dirhmun in dah kan um cio ve.

Kan nih Jesuh hnu zultu a simi hna zong hlaan lio Jesuh zultu hna bantukin thazaang pek ka si ve cio ko hna. Cucu, “A zawmi kha va damter hna u, mithi kha va thawhter hna u, thinghmui kha va thianter hna u, khuachia kha va thawl hna u,” timi kha a si ve ko. Chikhat te vun ruat ve hmanh law, na pawngkam ah harsatnak a tongmi zeizat dah an um? An caah zei lei kap in dah bawmhnak na pek khawh ve hna ning a si? Lunglawmhnak, ruahchannak, le hnemhnak te hna kha na pawngkam a ummi hna sinah na pe kho hna lai maw?

Jesuh, Pathian nih nifatin kan nunnak ah relcawklo veel-thluachuah a kan pek. Cucu a lak in a kan pekmi an si. “Nannih nih man pek loin nan hmuh i man pek loin va pe ve hna u,” tiah Jesuh nih a kan ti (Matt 10:8). Man pek loin kan hmuhmi lunglawmhnak, ruahchannak, hnemhnak tibantuk hna kha kan pawngkam a ummi hna sinah cheu ve hna u sih. Na dawtnak, naa lawmhnak, na zangfah thiamnak hna kha hawi dang hna sinah pek khawh i zuam. Cubantuk hna cu man pek loin na hmuh mi Pathian laksawng an si timi kha i thei.

Add new comment

1 + 2 =