Siannak in Hmuhmi Thluachuah

Nihin Bupi nih a kan thimpiak mi cathing(Mak 6:33-44) chungah "Jesuh cu lawng chung han a hung chuak i mi cu vialte aj hmuh hna tikah khan a zaang an fak ngaingai, zeicahtiah khaltu a ngei lomi tuu bantuk an si. Cucaah thil tampi a cawnpiak hna" tiah a ti(Make 6:34). Nihin ni caan zongah khaaltu a ngei lomi tuu bantuk Khrihfa mi hna tampi an um. Jesuh bantukin zaangfahnak lungthin mit in zoh an hau. Cun Jesuh sinah, khamhnak lam lei an panh khawh tthannak hnga ding caah  hruai an hau.
Jesuh nih a thawngtha bia a ngaitu mibu pi kha rawl dangh awkah zultu hna kha: "Nanmah nih ta ei awk cu nan pek hna" tiah a fial hna tikah zultu hna nih Jesuh fialmi rian cungah lunghrinhnak an ngei. Kan nih Khrihfa mi hna zong Pathian a bia mi le a cawnpiak mi phunglam a zultu kan si kan ti ko lio caan te ah khin Pathian fialmi rian cungah lunghrinhnak kan ngei tawn ve. "Ka thlacamnak hi a tling taktak hnga maw? Ziah! mah tluk in Pathian sin thla ka cam ko zongah zeihmanh a ka leh mi a um ttung lo" tiah kan ti khawh men lai. Sihmanhsehlaw khuaruahhar nak rian a tuan tak tu ding cu Jesuh, Pathian a si kha kan philh tawn. Kanmah thil ti khawhnak cung lawngah thil a si kho dingin kan ruah sual tikah kan cungah Pathian tuahmi khuaruahharnak thil kan hmu kho tawn lo. Pathian thil ti khawhnak, Jesuh thil ti khawhnak cung tu ah khan zumhnak tling ngeih ding a si.
Pathian nih khuaruahharnak thil a tuah tikah kanmah ngeihmi thilri chawva tlawm te chungin a tuah tawn. Amah sin kan pek a si ah cun a let tampi  in a karhter ko."Changreu zeizat dah nan ngeih? Va ka u law va zoh tuah u" tiah zultu hna kha a hal hna. Jesuh sin ah zultu hna nih an hmuh mi changreu tlang nga le nga pahnih an pek tikah rawl a ei mi 5000 leng  nih khim tein an ei pin ah a hlei rih. Pathian sinah siang ngai in kan pek a si ah cun Pathian nih siang ngai in a kan pek ve ko lai.