Siannak Lungthin

Photo Credit

Sunday, November 22, 2020

Mah zawn ruahlo in midang va bawmh le dawt ruangah zeitluk in dah lawmh a si ti hi kan hngalh cio mi a si. A dik mi dawtnak cu zeitik hmanh ah mah zawn aa ruat bal lo, siannak lungthin a ngei. Hi kong he pehtlai in nihin kan theih mi thawngtha bia ah kan Bawipa Jesuh Khrih nih biakinn pawngah dir in cheu hra cheu khat a petu hna a zoh hna i a hnu zul tu hna sin ah fiang tein a cawnpiak hna.
Bawipa nih mirum pawl pekchanh mi kha thangthat lo in nuhmei nu pek mi phaisa sen pahnihte a thlak mi kha a thangthat. Bawipa cawnpiak duh mi cu a fiang ko. “Dawtnak cu sui le ngun nak in a man a sung deuh” ti mi a langhter duh caah a si.
Cheu hra cheu khat pekchanhnak kan ti mi ah hin kan lungthin tak te in pekchanh dingin Bawipa nih a kan duh piak. Siannak um tuk lo in pek mi chawva cu zeitluk in tam hmanh sehlaw a man a um lo. Siannak lungthin he pek mi chawva cu zeitluk in tlawm hmanh sehlaw a man a sunglawi zungzal.
Pathian sin kan pekchanh tikah a zoh mi cu a tlawm le a tam si lo in a pe tu lungthin kha a bia pi tinak a si. Nuhmei nu nih hin a ngeihchunh phaisa tlawm te hi a mah caah aa chiah khawh mi a si ko. Sihmahsehlaw, mah zawn ruah lo in a ngeihchunh chawva a dih lak in Pathian sin a pek tik ah Pathian nih a thangthat. Pathian nih thangthat kan si cio a si ah cun zeitluk in dah thluachuak mi kan si cio hna hnga ti hi ruat cio hna u sih.
Kan Bawinu Mary zong Pathian nih a vancung mi hmangin a thangthat ve: “Pathian nih nangmah cu vel an ngeih”(Lk 1:30); Elizabeth zong nih Pathian Thiang Thlarau in a chim mi cu: “Nangmah cu nu vialte lakah thluachuak bik nu na si”(Lk 1:42) tiin a ti ve. Zeicah kan ti a si ah cun Bawinu Mary zong nih a zeizong vialte kha Pathian sin ah a pekchanh caah a si.