Siannak Lungthin

Tthatnak kan tuah ko kan ti lio caan zongah hin tthat lo nak te te zong an hung chuak kho tawn ve. Tthatnak tuah ding kha i zuam ding le tthat lo nak tuah kha hrial ding timi cu aho paoh nih theih cio mi a si ko. Tuah kel tawn mi hna hi kan nunnak ah fek piin a hram aa bunh tawn. Tthatnak kan tuah a si ah cun kan nunnak ah tthat nak tampi kan chuahter khawh bangin tthat lo nak kan tuah a si ah cun kan nunnak ah tthat lo nak tampi kan chauhter ve khawh. Kan tuah lengmang tawn mi hna hi caan sau a rauh tikah kan caah a ttha mi a si te hnga maw ti hi theih in ralrin nak ngeih kan hau.

Ngandam nak caah lente kan i celh. Lente celh cu ngandam nak caah a ttha mi a si ko. Sihmanhsehlaw a hleihluak tuk in kan i celh a si ah cun kan rian zong kan tlolh khawh, kan tha zong a dih kho i tthat nak lei panh loin tthat lo nak lei tu a si ter tawn. Pumh le rawlulh thlacam timi hi thlarau caah a herh hringhran mi rian a si. Sihmanhsehlaw, ralrinnak ngeih lo le a hleihluak tukin kan tuah a si ah cun kan caah thil ttha a si kho dih ve hnga maw? Jesuh Khrih cu minung kan sitthat nak ding caah le kan dam nak hnga ding ca lawng ah lam a kan hmuhsak tu le a kan cawnpiak tu a si (Matt 12:1-8).

Mithaing Augustine nih: “Nangmah tel loin an sertu Pathian nih nangmah tel loin an khamh lai lo” tiah a rak ti bal. Jesuh nih a laifanglam nunzia in nun ding hi a kan duh piak mi a si. Mirang phungthluk ah “Extreme never good” “luantuk cu zeitik hmanh ah a ttha lo” tiah an ti ve. Sihmanhsehlaw, nifatin kan nunnak ah hin sualnak chungah kan tlak nak hnga lo ding cu i zuam zungzal kan herh mi a si.

Nihin cathiang kan rel mi (Mark 12:38-44)chungah hin phun hnih in ruat hna u sih. Micheu cu leng lei lawngin midang nih ka hmu hna seh tiah thiam cuh a hmang mi hna le chung lei in biatak siannak lungthin he aa pe i rian a ttuan mi tiin zoh hna u sih.

Minung kan si ve caah chung lei kong kan hmu dih kho hna lo. Leng lei zoh tikah mil ngai in a um mi hna kha lawmh deuh duhnak lungthin kan ngei tawn. Jesuh nih biakinn chungah a hlu a pe mi hna kha a zoh hna tikah zeibantuk lungthin in dah an pek timi a theih dih ko. An lungthin kha a zoh ko hna. A cheu cu ka lawm hna seh tiin mithmai hmuh a duh mi hna kha a thangtthat hna lo. Cu caan lio te ah “a si a fakmi nuhmei pakhat a ra ve i pia hra tluk a man a simi dar tangka pahnih a sanh ve”(Mark 12:42-44) kha a hmuh tikah a lungthin tak in a hlu a pe mi nuhmei nu tu kha a thangtthat. Pathian nih cun a sin kan pek tikah kan lungthin (Kan i tinhmi) kha a zoh. Mithmuh in zeitluk a tam timi kha a zoh lo.

Kan nih hna zong Pathian sin kan ngeih mi (fimnak, thiamnak, dawtnak) kan pek tikah lungthin tak tein a pe kho tu Khrihfa ttha si khawh i zuam zungzal hna u sih.