Siannak Lungthin

Nihin Zarhkel(32) Zarhpi Zi ah kan relmi cathiang hna chungin Bupi nih a kan cawnpiak duhmi cu “Siannak” kong a si. Sianginn ca chim saya/ma te hna nih kumpi kum khat a hun dih tikah siangngakchia hna kha caminpuai an phitter tawn hna. Cu ve bangin Bupi zong nih kumpi kum khat chung ruah ding le thazang lak dingin a kan suaipiak mi calendar zong a hun dih cang lai. Zeitluk in dah kan thlarau caah timhtuahnak kan ngeih cang hna timi kha kan mah le kan mah kan i check a hau cang.

Tu kum chungah zei tluk in dah midang hna cungah dawtnak kan ngeih i cu dawtnak kan ngeih mi cu siannak in a si maw? Zei bantuk tthatnak hna dah kan tuah cang hna? timi kha kan i check cio a hau.

Khrihfa kan si nak ah hin duhfah hakkauhnak le ruamkainak hna nih Pathian a kan hlatter tawn. Sihmanhsehlaw, tangdornak lungthin he Pathian kan kawl nak nih hin kan thlarau caah thazang a tthawnter i Pathian he a kan neihter khawh deuh.

Minung cu a si a fak mi lawng te kan si ko hna. Chawva lei in a si lo hmanhah thil pakhat khat ah kan si a fak cio ko. (1 Siangpahrang 17:10-16)Zarefath khua i nuhmei nu tluk in kan si a fak tak ko maw? Nu hmei nu nih Profet Elijah rawl a pek bangin kan nih hna hi tah Pathian cungah kan ngeihmi thil pakhat khat siang ngai in kan pe ve tawn maw? Mark 12:38-44 chungah kan hmuh mi nu hmeinu tluk in siannak lungthin kan ngei kho ve cang hna maw?

Midang nih tthatnak an tuah ruangah khamhnak ka co ve ko lai tiah kan i ruat sual tawn maw? Kan mah pumpak in tthatnak kan tuah a herh bangin, midang cung zongah bawmhnak a pek kho tu le siang ngai in “Dawtnak” lungthin a ngei kho mi si kan herh.