Sining

Kan mit cu kan lungthin chung i a ummi langhter nak thlalang a si. Minung pakhat lungthin chung i a ummi dinfelnak, zernak, hrokhrolnak, thatnak le chiatnak timi hna cu kan mit au nak hna ah hin an lang ti a si. Kan mit cu lungthin chung a ummi langhternak thlalang bantuk a si ahcun kan hmurka in kan chimmi cu minung pakhat khat nih a lungthin chungin aa dirpi mi langhternak thlalang bantuk a si ve.

Mi tampi nih lungthin chung a ummi hna kha an chim theu tawn. Ei le din ah a awr mi pakhat khat nih ei le din kong lawng a ruah i a chim bangin, bawlung chuih a zuam mi nih bawlung kong lawng a ruah i a chim ve. Ramkel kong he pehtlai in rian a tuanmi (interest) hna nih cu kong lawng cu an ruah i an chim bangin, sipuazi lei kap in a zuam mi hna nih sipuazi kong lawng an ruah i an chim tawn ve. Minung pakhat pakhat nih a tu le tu a chim lengmang mi kong he pehtlai in kan zoh tikah mah mipa/nu sining kan theih khawh.

Jesuh Khrih nih, “vawlei in a rami cu vawlei ta kha a si i vawlei cung thil kong kha a chim. Cunglei in a rami cu zeizong vialte cungah a um. Amah (Jesuh) nih cun a hmuhmi le a theihmi kha a chim,” tiah a ti (Jn 3:31-32). Kan nih minung hna cu vawlei cungah a ummi kan si ko hna na in vawlei caah sermi kan si hna lo. Pathian nih amah caah a kan sermi kan si caah Pathian kong lawng kha a ruat i a chim dingmi kan si.

Khrihfa mi hna nih cu Jesuh Khrih kan zumhnak ah rian fialchih mi le rian khinhchih mi kan si. Thawngthabia phuan ding le thawngthabia i nunpi ding kha a si. Jesuh ka zumh timi lawngah a za lo; Jesuh cawnpiakmi kha i nunpi ding a herh. Jesuh nih, “kan fialmi vialte hna hi an zulh nakhnga va cawnpiak hna u,” (Matt 28:20) tiah a ti bangin Jesuh fialmi kha kan nih vialte hna nih “zulh ding le cawnpiak ding” in riankhinh kan si.

Cuasicaah, Pathian he aa pehtlai mi thil “cung lei thil” hna konglam lawng kha ruah in kan chim, kan zulhawk a si.