Sining cio in Bawipa rianṭuan

“Cu hnu tlawmpal ah cun Jesuh cu khuapi he khuate he a tlawng duahmah hna i Pathian Pennak kong Thawngṭha kha a chimh hna. Lamkaltu pahleihnih hna nih khan an zulh i an zawtnak le thlarau ṭhalo nih a tuah hnanak in a damtermi hna nih khan an zulh ve. Cu hna cu a chungin thlarau ṭhalo pasarih a chuahpiakmi Mary (Magdalin timi) le Herod zung i bawi a simi Khuza nupi Joanna le Susanna le Jesuh le a zultu hna kha an ngeihmi thil in a rak bawmtu hna, nu dang tampi kha an si.”(Lk 8:1-3)

Jesuh Khrih kong le a thawngṭhabia midang hna sinah na phuang bal ve cang maw? Nihin nicaah Bupi nih a kan thimpiakmi cathiang (Luke 8:1-3) nih hin thawngṭhabia chimphuan ve ding Baiwpa hnu zulhin bawmhnak pek ve cio ding in a kan sawm. Bawipa thawngṭhabia hi na nunnak in siseh, tuahsernak in siseh, chimphuannak in siseh, internet cungah chimphuan le langhter nak in siseh na tuah - na ṭial bal ve cang maw? Ṭha tein ruat hmanh.

Khrihfa ka si ko, Jesuh hnu zultu ka si ko tiah biatak tein aa zum – aa timi hna nih cun Jesuh kong chimphuannak ah hin zeitikhmanhah an ning a zak bal lo. Jesuh thawngṭhabia ka chim bal cang maw, asiloah ka rak chimphuan mi hna kha keimah hrimhrim nih ka zul kho tak cang hna maw? timi biahalnak zong mah tein i tuah ding a si.  

Thawngṭhabia chimnak ah hin zeitikhmanhah ning zah ding a um lo. Zeicah tiah cun Jesuh kong le a thawngṭha bia cu lam le biatak le nunnak (Jn 14:6) a si caah a si. Jesuh thawngṭhabia chimnak hmanh nih khan mi ṭha lo tiah ruahmi hna hmanh kha lam ding lam hmaan ah a phanhter ṭhan khawh ko hna. Thawngṭhabia na phuannak nih khan a lung a dong mi hna kha ruahchannak a pek khawh ṭhan ko hna. Pakhat cio thinlung chungah Jesuh a um khawhnak hnga ding caah cun a chimtu le a phuang tu an um cu a herh zungzal mi a si ko.

Khrihfa kan si caah Jesuh thawngṭhabia chimphuan ding cu kanmah rian hrimhrim a si tiah i theih ding zong a si. Jesuh kong kan phuanmi nih nikhat hnu nikhat amah Jesuh he a kan lawhter chinchin ko lai. 

Nihin kan rel mi cathiang chungah Jesuh le zultu hna caah a herh ning in rian a ṭuanpiak tu NU hna kong zong kan hmuh khawh rih. Hi nu hna hi aa lo cio lomi background in a ra mi an si. Sihmanhsehlaw Jesuh hnu an zulhnak le rian an ṭuannak ah hin pumkhat an si kha kan hmuh khawh. An nih hna zong hi tuahsernak in thawngṭhabia a phuang mi an si ve.

Jesuh Khrih vailam cung a thih lio caan ah a pawngah a umpi mi hna kha kan zoh hna a si ahcun nu pawl ngawt lawng te an si kha kan hmuh khawh (Lk 23:49).  Jesuh thihnak in a thawhṭhan hnu ah a rak hmu hmasa mi hna zong kha nu pawl ṭhiamṭhiam an rak si (Luke 24:9–11). Pumh caan ah siseh, bupi rianṭuan lohaapeknak ah siseh nu pawl deuh kha hmuh an si deuh tawn. Cun pumh caan le Pathian thangṭhat caan hna zongah hin nu pawl deuh hi hmuh an si ṭhiamṭhiam rih. Jesuh Khih chan lio thawk in nihin ni tiang nu pawl nih dai tein Bupi rian an ṭuannak hi hmun tampi ah hmuh khawh a si. 

Dawtmi u le nau hna nihin ni kan relmi cathiang chung i langhter mi nu hna bantukin Jesuh Khrih nih a dirhmi bupi chungah a herhbaunak rianṭuannak ah dai tein aa pe kho mi kan si cang hna maw?