Sining cio hi khuaruahhar thil an si

Mary timi nu te cu Pathian cungah a thin a hung tuk. Sehzung pakhat ah rian luh khawhnak ding caah ni(9) chung novena a tuah i Pathian sinah thla a cam. Sihmanhsehlaw a thlacam a tling lo, thla a cam bal lomi a hawi nu tu nih khan rian a hmuh tikah Pathian cungah a thin a hung tuk i thlacam duh ti lo le pumh duh ti lo in a um.

Thla khat a rauh hnu ah rian luh a rak duh tuk nak sehzung pi cu mei a kang i hliamhma a hmu mi hna zong tampi an um. Cutik lawngah Mary cu a lung a hung fim i Pathian cung a thin hunnak vialte kha aa ngaihchih tthan i rian a hmuh lo ruang tu ah khan Pathian cungah aa lawm kho tthan. Mary nih cun: “Pathian duh ning in rak um lo in keimah duh ning tu in Pathian kha um ter ka rak timh. Pathain hneksak nak cohlaang duh loin keimah tu nih Pathian kha hneksak ka rak timh i Pathian thil ti khawh nak lawng kha rak hmuh ka duh. Pathian nih lungsau tein a rak ka kilven peng i ka sualnak a kan ngaihthiam mi hrimhrim hi khuaruahhar tuk a si” tia Siangbawipa sinah a chim.

Nihin kan theih kan relmi cathiang (Matt 12:38-42) chung kan zoh tikah Farasi mi hna nih Jesuh kha Messiah a si taktak le si taktak lo theih hngalhnak ding caah khuaruahhar thil kan tuah piak tiin an hal nak kong a si. Thlarau tthalo le khuachia tthalo a tthawl mi hna zong an hmuh ko nain khuachia bawi Beelzabul thawngin a si tiin sual tu an rak phuh(Matt12:22-24). “Pathian Fapa na si ah cun hi lung hi changreu ah canter ko, biakinn cungin zuang” (Matt 4:3-11)tibantuk khuaruahhar thil tuah dingin fialmi bia hna hi Satan sin in a ra mi bia si ti kha Jesuh nih cun fiang tein a hngalh cio mi a si ko. Cu ruangah cun an hal mi thil zeihmanh a tuah piak hna lo. Zum lo tu hna caah zeibantuk khuaruahhar thil liannganhnak hna hmanh hi san an tlaih lo bangin, zumtu hna caah cun khuarauhhar nak thil tuah piak len zong hi a herh ngai mi a si fawn lo.

Nifatin kan ton kan hmuh mi thil hna hi Pathian zangfah dawtnak thil khuaruahhar hna an si tiin kan hmuh thiam hna a si ah cun, zeibantuk thil khuaruahhar hmanh kan herh lai lo. Thil dang cu zoh loin kan mah kan sining le kan nunning, kan um ning hrimhrim hi thil khuaruahhar tuk an si ko.