Sining I theih a Biapi

“Na mit chung i a ummi thingtan cu hmu ṭung loin zeitindah na unaupa cu, “Ka nau, na mithnawm kha in cawihpiakning,” na ti khawh? Midepde. Na mit chung i thingtan kha chuah hmasa law pei na unau hna mit chug i a ummi mithnawm hme tete cu na hmuh khawh lai i na cawih khawh lai cu,” tiah a ti.(Lk 6:42)

Bawipa Jesuh nih midang kong he pehtlai in khulrang tuk in biakhiahnak tuah lo ding timi kha nihin kan relmi  cathiang (Luke 6:39-42) chungin a kan cawnpiak. Cun kan ruahnak siseh, kan lungthin in siseh kan tuahser nak vialte ah hin Amah Pathian lawnglawng kha pakhat nak bikah chiah in um kal-ṭhut dir ding zongin a kan  cawnpiak duh mi a si fawn. Zeicah tiah cun Pathian kan theih, a kong kan ruah a si ahcun midang chiatnak kong le ṭhat lonak kong ruahnak caan a um lo caah a si. Mah le mah kong i ruah hmanh hi a fawi lomi a si.

Fawi tein midang hna cungah biakhiahnak a tuah tu hna zong hi an sining kan zoh hna a si ahcun mi kong ceih le thangchiat a hmang deuhmi le a huam deuhmi an si tawn. 

Minung pakhat khat nih kan cungah a thinhun buin sual-palhnak a tuah tikah huatnak lungthin siloin thinhunnak he kan leh ve men ko hna lai. Tuahsernak hna ah hin ‘Huatnak’ timi le ‘thinhunnak’ timi in tuahser-lehrulhnak ah a thil sining le kal ning an i dan tuk ning kha theih khawh a si ko. Pakhat khat cungah na thin a hung men lai, sihmanhsehlaw a lung aa thlen a si ahcun na cohlaan khawh ṭhan ko lai.  “Huatnak” kan timi tu ah hin cun cohlaan duhnak lungthin hrimhrim a um lo; cun ngaihthiam duhnak lungthin zong a um lo. 

Cuasicaah huatnak lungthin kha kan hlawt hmasat lawngah Jesuh cawnpiaknak a cohlang kho mi kan si lai. Huatnak lungthin kan hlawt hmasat lawngah midang hna kha kan dawt khawh hna lai i kan dawtmi hna zong kha thil ṭha le lam ṭha kan cawnpiak khawh hna lai.