Sual ngaihchihnak

“Sual Ngeihchihnak A Biapi” Hakha RVA in thawngṭha a ngaitu Khrih ah dawtmi nu le pa, u le nau hna, Bawipa nih thluachuah in pe hna se law ṭhatlonak vialte chungin in khamh ko hna seh. Kan ram ca i kan thlacamnak vialte zong a rau hlan ah tlingin kan ram ah daihnak, remnak, ṭhanchonak um ko seh. A tu lio hi kanmah biaknak lei in Lent caan Ulh caan chung kan um lio caan a si. Lent caan hi rawl ulhnak, sa ei ulhnak, a tam deuh a ṭha deuh in thlacamnak, sual ngeihchihnak ti bang tuk hna ngei in, a bik in sualnak ṭhatlonak vialte hrial i zuam in Pathain sin ah i let ṭhannak, Pathian he i neih ṭhannak zuamnak caan sung caan ṭha asi. Lent caan hi sual ngeihchihnak ngei in Pathian sin kir ṭhan caan a si ban tukin a tu hrawng i Bible kan rel mi hna zong ah sual ngeihchihnak, Pathian sin i let ṭhannak kong hna kha a tam bik in kan rel tawn.

Nihin 2021 February 24 ni i kan relhnga mi Bible hna zong sual ngeihchihnak kong an si. A veikhat relnak ah Jonah 3:1-10 tiang a si i profet Jonah nih Nineveh khuapi ah Pathian nih a chim ter mi bia a chim i Nineveh khuami hna zong sual ngeihchihnak, lung thlennak an ngei i Pathian nih dantat nak in a luat ter ṭhannak kong a si. Salm kan rel hngami cu salm 51 nak chungin a si i David Siangpahrang nih thil ṭha lo a tuah sual ruangah aa ngeihchih i Pathian sinah ngeihthiam a halnak thlacamnak a si. Gospel kan rel hngami cu Luka 11:29-32 tiang a si i Bawipa Jesuh nih sual ngeihchih a duh lo mi hna kha ralrinnak a penak kong a si. A tu Gospel kan rel piak ta rih hna lai. Luka 11:29-32 29Mi nih Jesuh kha an zual lulh ko lioah khan a thawh hna i, “Tuchan mi hi miṭhalo an va si hringhran dah. Pathian hnatlaknak a si ti hngalhnak caah khuaruahhar kan hmuhsak tuah, an ti, sihmanhsehlaw Jonah khuaruahharnak kha dah ti lo cu zeihmanh hmelchunhnak pek an si lai lo. 30Profet Jonah cu Nineveh khuami hna caah hmelchunhnak a rak si bantuk khan Mi Fapa zong hi tuchan mi hna caah hin hmelchunhnak a si ve lai.

31Biaceih Ni ah cun thlanglei Siangpahrangnu Sheba kha a dir te lai i atu chan mi hna hi sual a phawt te hna lai, zeicahtiah Solomon fimnak bia ngaih duh ah khan anih cu lamhla piin a ra i asinain hika ah hin Solomon nakin a ngan deuhmi a um ko ṭung. 32Biaceih Ni ah cun Nineveh khuami cu an dir lai i nannih kha sual an in phawt hna lai, zeicahtiah annih cu Jonah bia chimmi an theih tikah khan an ziaza an i thleng, asinain hika ah hin Jonah nakin a ngan deuhmi a um ko ṭung,” tiah a ti. (Bawipa thawngṭhabia a si.) Kan Pathian cu ‘zaangfahnak le vel a ngeimi a si, a thin a fual i a biakamnak kha a zulmi a si, ka tlunter lai tiah a timi harnak kha leet i ngaihthiam awk tu ah aa tim zungzalmi Pathian a si,’ ti kha Joel dal 2 chungah kan hmu i vutcam thuh ni, Ulhnak caan a thok ni ah zong kan rel. Kan Pathian cu zaangfahnak a ngei, a thin a fual, mi a ngaihthiam kho cem tu a si natein kan mah lei nih kan tuah hrimhrim a hreh mi pakhat a um. Kan tuah hmasa a hau mi pakhat a um. Mah cu zei dah a si ti siahcun a tu Joel 2 nak chung i kan rel mi a cung deuh ah zeidah a um ti siah cun, ‘nan lung tak tein i ngaihchih u, Bawipa nan Pathian sinah cun ra kir ṭhan tuah u,’ tiah a chim mi a um.

Cu asicaah Bawipa i zaangfahnak, Bawipa i ngeihthiamnak a hmumi, a co mi kan si nak hnga caah sual ngeihchihnak ngei in a mah sin ah kan kir ṭhan peng a hau. Ngeihchinnak kan ngei i a mah sinah kan let ṭhan a si ah cun ngaithiam kho lo mi a ngei lo. Kan sualnak a kan ngei thiam lai i kan herhmi thluachuah vialte zong a kan pe dih lai. Minung kan sualnak ruangah ‘ka tlunter lai tiah a timi harnak’ hmanh kha a leet ṭhan lai. Nihin Bible veikhatnak i kan rel mi Nineveh khua kong ban tuk a si. Nineveh khuami hna cu an sual tuk i Pathain a thin an hung ter. An ṭhat lonak nih a cerh in a ka cerh tiah Pathian nih profet Jonah sinah a chim. A tuanbia a tawinak in kan chim ding a si ah cun, Bawipa nih profet Jonah sinah Nineveh khuami hna kha ‘hi hnu ni 40 chungah Nineveh hi a rawk lai,’ tiah va chim hna a ti i Jonah nih a chim tikah Siangpahrang in thok in an saṭil hna tiang in rawl ulh in an um, ngeihchihnak an ngei i vutcam lak ah thu in thla an cam. Pathian sin ah an lung takin an kir ṭhan tikah Pathian nih Nineveh a rawk lai a ti cang mi kha a ngeih thiam hna i a hrawh ṭhan ti lo tikha kan Bible chungah kan hmu. Sual ngeihchihnak, Pathian sin an kir ṭhannak thawng in ṭhatlonak, harnak, thihnak chungin an luat.

Nihin kan rel mi Gospel chungah cun sual ngeihchih a duh lo mi hna kong kan hmu, kan rel. Milungkhong cheu khat hna nih Bawi Jesuh sinah an zum khawh nak hnga caah khuaruahhar tuah kha an hnek. An lung khong i zumduh lo in an um i khuaruahhar tuah piak lawng te an duh caah, sual ngeihchihnak an ngei duh lo caah, Bawi Jesuh nih zei tin dah a ti hna? ‘Biaceih Ni ah cun Nineveh khuami cu an dir lai i nannih kha sual an in phawt hna lai, zeicahtiah annih cu Jonah bia chimmi an theih tikah khan an ziaza an i thleng,’ a ti. Sual ngeihchihnak a ngei duh lo mi cu sual phawt an si lai i ngeihchihnak a ngei mi hna cu Pathian zaangfahnak an hmu lai i Pathian nih a thluachuah hna lai. Pathian nih Ninaveh khuami hna ni 40 caan a pe bantukin kan nih zong ni 40 chung Lent caan kan ngei ve. Mah le mah i ruah ṭhan in kan nunnak ah rem a herh mi hna kha caan kan ngei lio te ah remh khawh i zuam cio hna u si.

Fr. Peter Lal Zin Thang (Hakha Diocese)