Tangdornak lungthin a ngeimi Bawinu Mary

Nawl ngaihnak lungthin a ngeimi hna cu tangdornak lungthin a ngei mi an si i cu bantuk lungthin cu Pathian sin in a ra mi lungthin zong a si. Kan Bawipa Jesuh Khrih zong hi vawlei cung a rak nun lio ah tangdornak lungthin he mi vialte kha a rak cawnpiak hna i Pa Pathian nawl kha a rak ngai zungzal mi a si. “Ka Pa, na hna a tlak ah cun hi hrai hi ka thialpiak ko. Sihmanhsehlaw keimah nawl si loin nangmah nawl si ko seh”(Lk 22:42) tiin Jesuh nih a minung sining in a duhnak kha a rak hlawt.

Bawinu Mary zong tangdornak lungthin le nawl ngaihnak lungthin a rak ngei zungzal tu a si. Minung hna nih nawl ngaihnak kan timi ah hin tuah khawh dingmi thil hna cungah le theih khawh mi sining hna chungin nawl ngaih hi a si deuh tawn. Mary zong nih minung sining le ruahnak in Pathian vancung mi nih a rak chimh mi “Nau na pawi lai i fapa na hrin lai”(Lk 1:31) tiah a rak timi bia sullam kha a rak thei kho dih lo. A khuaruah zong a rak har ngaingai i a theihmi le a hmuh mi vialte hna kha a lung chungin aa cinken hna i thuk piin a ruah hna(Lk 2:19) . Sihmanhsehlaw “Kei cu Bawipa salnu ka si ko, na chim bang cun ka cungah si ko seh”(Lk 1:38) tiah tangdornak lungthin he Pathian vancungmi chimmi bia kha a rak leh i Pathian program kha a rak cohlan.

(Gen 3) Adam le Eve hna zong Pathian nih tuah lo ding, ei lo dingin bia a rak chimh hna. Zei ruangah dah “ei hlah u” tiah a kan ti hnga tiin khuaruahhar in an rak um kho men. Sihmanhsehlaw Pathian nih a rak chimh mi hna kha rak ngai loin tukforhtu Satan bia an rak ngaih caah sualnak le thihnak mi vialte cungah a hung phan. Pathian nawlbia buar cu sualnak le thihnak a si. Cun Adam le Eve hna nih an sualnak i ngaihchih duh loin pakhat le pakhat cung tu ah sual an rak i phaw hna.

Bawinu Mary nih Pathian nawl a rak ngaih caah Fapa Pathian i a nu siding in thim a rak si. Pathian nih a rak thim i a rak thangthat mi Bawinu Mary cu kan nih Khrihfa mi hna zong nih thangthat cio ding a si. Bawinu Mary nih tangdornak lungthin he Pathian bia a rak cohlan ruangah Fapa Jesuh Khrih thawngin minung vialte hna caah vancung kutka cu aa hung than. Lungthin tha a ngei mi hna le tangdornak lungthin he Pathian bia a ngaimi hna caah cun vancung kutka cu aa hung zungzal ko.

Bawinu Mary bangin tangdornak lungthin he Pathian bia a cohlang kho tu le a zul kho tu sikhawh zungzal dingin Pathian sinah thluachuah veel hal zungzal hna u sih.