Teinak

Nihin kan theih mi thawngtha bia (Mark 10:46-52) kan zoh tikah mitcaw pa nih Pathian sunparnak a hmuh khawh i a ttha ko mi hna nih an hmuh khawh lo nak kan theih khawh. Mitcaw taktak cu a ho khi dah an si hnga? Mitcaw Bartimaeus hi zeitik hrawng ah dah a mitcawt nak hi aa rak i thawk hnga? Zei ruangah dah David te fa chungin Khamhtu Messiah a chuah lai ti mi zong hi a theih ve hnga?

Pakhat a um mi cu zeitik hrawng in dah a mit a cawt ti mi hi a bia pi ah chiah lo in, mitcaw Bartimaeus hi Pathian biaknak lei cawnpiak tu hna chim mi a thei mi a si ti cu a fiang mi a si. Cun zumhnak le ruahchan nak he a nung mi a si zong kan hmuh khawh.
Biaknak lei ah aa zuam mi hna le a ding a fel mi hna cu an nunnak ah dawn khan tu te te hi an tong ttheo tawn. Bartimaeus nih Bawipa a pawngkam in a kal a theih tikah fak pi in: “David Fapa, ka zaangfah tuah”(Mark 10:48) tiah a au. Pawngkam a um mi hna nih dai tein um ding ah an chimh ko nain, faak chin chin in: “David Fapa, ka zaangfah tuah” tiah a au. A au nak le a thlacam nak cu Bawipa nih a theih piak i damnak a pek.

Midang cungah zangfah zawn ruahnak kan ngeih tikah nahchuahnak a ngei mi hna nih tthat lo nak lei in kan tuah sernak hna kha an mer tawn i kan thangchiat nak hnga ding caah a kawl mi hna zong tampi an um hna. Pawngkam a um mi hna chim mi lawng kan ngeih peng a si ah cun zeitik hmanh ah tei nak kan hmu kho lai lo. Kan zumhnak le kan i tinh mi cungah fek tein kan dir ngam peng a si ah cun teinak kan hmuh hrimhrim ko lai. Tukforh tu nih cun thil ttha a tuah mi hna an tlak ding lawng khua a kang tawn timi hi thei cio hna u sih.

Pathian sermi thil hna cungah tthatnak kan tuah mi cu Pathian rianttuan a si. Pawngkam dawnkhan tu hna kha tei khawh i zuam zungzal hna u sih. Zeizong vialte a tei tu Bawipa Jesuh sinah nifatin kan ton mi tukforhnak tei khawhnak nak thazang, veel le thluachuah hal zungzal hna u sih.