Thawng`tha

“Zeiruangah Jesuh Kan Kawl?”

2021 April 19 (Cacawn Nikhat) ni thawngṭha chimnak.
“Biatak kan chimh hna: nan ka kawl hi ṭhawnnak in ka tuahmi thil nan hngalh caah khan a si lo; nan duh zat in changreu nan ei caah khan a si ko. Hi a rawk khomi rawl caah hin ṭuan hlah ngat u, a hmunmi rawl, zungzal nunnak rawl caah ta nan ṭuan. Hi rawl cu Mi Fapa nih hin kan pek hna lai, zeicahtiah Pa a simi Pathian nih keimah cungah hin a lungsinak kha a khenh cang.”

Hakha RVA in thawngṭha a ngaitu Khrih ah dawtmi nu le pa, u le nau hna, Bawipa nih taksa thlarau ngandamnak le hnangamnak in pe cio ko hna seh. Nihin kan rel hnga mi Gospel chung in thlarau thazaang la hna u si ti sawm kan duh hna. Kan rel hnga mi Gospel cu Johan 6:22-29 tiang a si. Nihin ah kan ruah ding ah ka duh mi cu zeiruangah Bawi Jesuh kan kawl asiloah zeiruangah Bawi Jesuh kan zul ti mi biahalnak a si.

Kan nih Khrihfa hna hi Bawi Jesuh a zultu hna kan si. Bawipa a kawl tu hna kan si kan ti zongah a palh lai lo. Nihin kan ruah dingah ka duh mi cu, ‘zeiruangah Bawipa kan zul, zeiruangah Bawipa kan kawl, zei dah kan duh i kan zul?’ tihi a si.Vawlei cung ah um mi minung hna hi kan ruahnak a lo lo, ka zumnak a lo lo, thil kan hmuh ning zong a lo lo. Jesuh Khrih a zumtu veve kar lak ah hmanh kha kan zum ning kha a lo lo i kan duh mizong a lo lo. Thawngṭha chimnak zong ah a phunphun in kan hmu tawn ko lai. Bawipa Jesuh na zumh ah cun na ngan a dam lai, na rum lai, harsatnak vialte in an khamh lai ti ban tuk in a chim tu zong an um i micheu khat nih cun mah ban tuk in chim tu hna hi an uar taktak ih, Jesuh Khrih kan zum ah cun vawlei cung ah zumlo tu hna nak in kan nun khua a nuam deuh lai tiah thazaang a la tu zong an um.

Mah hi level pakhat tiang hrawng cu a hman ve ko lai. Kan Bawipa cu kan thlarau ca lawngah a si lo in kan taksa ca zongah kan herh ning in thluachuah a kan pe tu a si, a kan zoh khenh tu a si. Kan thlarau nunnak le kan taksa ṭhanchonak hna hi a pahnih in a bia pi taktak mi a si. A pahnih in Pathain ih ser mi an si. Natein zei dah a biapi deuh timi kha cu a um. Bawi Jesuh vawlei cung a rat nak hi vawlei cungah kan nunnak a thi kho lo ding in tuah awk ah a ra maw, asiloah kan taksa a thi hnu ah kan thlarau zungzal nunnak ngah nak hnga caah a si? Zumtu kan dih lak in kan thei cio ko, Bawipa Jesuh cu vawilei cung ih a ratnak san cu kan thlarau zungzal nunnak a hmuhnak hnga caah a si.

Nihin kan rel mi Gospel chungah mizapi nih Bawi Jesuh an kawl nak kong kan rel. Mizapi nih an kawl, a hnu ah an zul natein Bawipa cu a lung a lawm lo. Ee minung tam pi nih an ka zul tiah lung lawm in a um lo. A kawl tu hna kha zei dah a ti hna? “Biatak kan chimh hna: nan ka kawl hi ṭhawnnak in ka tuahmi thil nan hngalh caah khan a si lo; nan duh zat in changreu nan ei caah khan a si ko. Hi a rawk khomi rawl caah hin ṭuan hlah ngat u, a hmunmi rawl, zungzal nunnak rawl caah ta nan ṭuan,” tiah a ti hna. A cawn piak mi hna an duh tuk ruangah siloin, an thlarau caah siloin vawlei cung thilri, taksa ca i rawl an duh ruang i an zul mi a si caah a kawl tu an tam ngai na tein Bawipa a lung a lawm kho lo. Zungzal nunnak rawl caah rian ṭuan u a ti hna.

Cu asi caah dawtmi zumtu nu le pa, u le nau hna; Jesuh Khrih kan kawlnak, kan zulnak hi a hmasa bikah kan thlarau caah a si hau, a cawn piak mi hna kan zum caah a si a hau, kan duhmi vialte hal zong a ngah ko na tein a mah duhnak tuah ding kha a biapi deuh in kan ruah a hau.

A mah duhnak a hmasa ah kan kawl a si ah cun kan taksa caih kan herh mi hna ca zong ah thinphan ding zei hman a um lo. Zeiruangah ti asiahcun a mah nih, Lk 12:31 ah “Amah Pennak cu biapi bik ah ruat u law nan herhmi thil vialte hi an pek ko hna lai,” tiah a ti. Vawlei cung thil le ri in kan sinpi nak hnga caah Bawipa a zultu siloin amah Pennak kha biapi bik in ciah in a zultu kan si kho peng nak hnga zuam hna u si.

Fr. Peter Lal Zin Thang (Hakha Diocese)