Thazang a kan petu cu Jesuh a si

Nuam tein le khing zang ngai in a um kho peng mi kum 85 a si cang mi sister nu pakhat cu mino pakhat nih, “Sister, zei ruangah dah nang hi hitin nuam tein na um thiam khawh peng ko ee?” tiah bia a hal ti a si.  Cu tikah sister nu nih a leh mi cu “ka chung i a lin-sa( A pu) mi vialte nifatin ka chuah peng caah a si ko” tiah a leh. Mino pa te nih cun ttha tein aa fiang lo i: “zei bantuk a lin-sa mi hme na chuah peng” tiah a hei hal tthan tikah sister nu nih cun, Bawipa thisa chiahnak inn lei khi a kut in a sawh piak i: “Khika ah khin ka chung i a lin-sa mi vialte ka chuah peng. Jesuh nih: “Rethei le thilrit mi vialte hna, ka sinah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang”(Matt 11:28-30) tiah a ti ruangah Bawipa sinah ka kal zungzal i Amah nih thazang thar a ka pek tthan lengmang caah a si ko” tiah a leh.

“Lungthin a dam ah cun pumsa zong a hninghno” timi bia hi tuah taktak nak in le ton taktak mi in a hung chuak mi bia a si. “Lungthin a zawt ah cun pumsa zong a ngor” timi bia zong hi a hmaan ngai mi bia zong a si ve. Thilrit vialte lak ah hin lungthin aa nuamh lo i a rih mi hi thilrit cem zong a si. Zeitluk in dah a rih kan ti a si ah cun kan ih bu in siseh, kan i hngilh bu tiangin kan phorh peng mi thilrit a si. Cucu mirang holh in “Stress” an ti i lungtur zawtnak, thi kainak, pawpi fahnak tiangin a chuahter kho tu thilrit a si.

Kan thilrit hna kha Jesuh Khrih sinah kan phuan, kan chiah a si ah cun kan seihman cu a zaang ko lai. Cun kan thlarau zong hnangamnak a hmu lai i damnak kan hmu zungzal ko lai. Bawipa sinah kan khingrihnak vialte phuang hna u sih law, Amah sin in thazang i lak zungzal hna u sih.