Theih le Tuah

Jesuh nih khual an tlawn pah in, “Farasi mi hna thilnu le Herod thilnu kha i ralring u” (Mk 8:15) tiah a zultu hna kha a ti hna. Bethsaida khua an phanh tikah mi nih mitcawpa Jesuh sinah an rat pi i Jesuh nih mitcawpa a damter nak kong (Mk 8:22-26) kha Bupi nih nihin ni caah ruah ti dingin a kan thimpiak mi Bible cathiang a si.

Zultu hna nih Jesuh Khrih thil ti khawhnak kha zeitluk hmanh in rak hmu ko hna hmanhsehlaw thlarau lei in an zumhnak mit a rak caw ziar. Jesuh thawnnak kha an hmu kho tak lo. Nihin ni kan rel mi cathiang ah Jesuh Khrih nih taksa lei in a mitcaw mipa a damter bantukin zultu hna i thlarau lei mitcawtnak zong kha a damter piak hna.

“Jesuh nih cun mitcawpa cu a kut in aa hruai i khua lengah a chuahpi” tiah a ti. “Khua lengah a chuapi” timi biafang hi vun zoh ti hmanh hna u sih. Zultu hna nih Jesuh thil ti khawhnak cungah siseh, Jesuh cungah an i bochannak le an zumhnak cungah lungtuainak ngeih loin, Jesuh thawnak le thil ti khawhnak kha fiang tein an hmuh khawh nak hnga ding caah a si. Kan nih hna zong Jesuh Khrih kan zumhnak cungah hna hnawhnak a kan petu hna le kan lung a kan tuai tertu thil hna kal tak in a daihnak hmun ah Pathian thawnnak le thil ti khawhnak kha kawl cio ve hna u sih. Jesuh nih a thil ti khawhnak fiang tein a kan hmuhsak ko lai.

“Jesuh sinah cun mitcawpa pakhat an ratpi i a rak tawngh nak hnga an nawl”(Mk 8:22) tiin kan hmuh than. Mitcawpa a dawtu hna nih Jesuh sinah bochannak le zumhnak lungthin he an rat pi tinak a si. Micaw pakhat sining dirhmun khi na ruat bal ve maw? Zeitlukin dah a har hnga? Hmuh duhmi zong hmuh khawh lo sining dirhmuh a si. Midang nih an hmuh mi le an theih mi an chimh lawngah a thei a hngal kho mi sining dirhmun a si.

Pathian he nikhat hnu nikhat kan i naih khawhnak hnga ding caah a kan dawtu hna le kan hawikom hna hi zeitluk in dah thil ti khawhnak an ngeih ve timi hi theih ding a si. Pakhat le pakhat thlacam kan i bawmhmi hi zeitluk in dah hmual a ngeih i a that, aa dawh timi zong theih ding a si. Pakhat le pakhat thlacam i bawm zungzal hna u sih. Pathian bia a kan cawnpiaktu hna zong hi Pathian he kan i naih khawh nak hnga ding caah le taksa, thlarau damnak kan hmuh khawh nak hnga ding caah a kan bawmtu an si hna timi zong kha philh hna hlah u sih. An cung zongah lawmhnak bia chim ding kha philh lo ding a si.

James nih, “A bia kan theih paoh ahcun a za, tiah nanmah le nanmah kha i hleng len hlah u. a bia cu a tuah tu in tuah deuh u. Mi a luattertu nawlbia tling chungah tha tein aa bih i cucu a ruat peng i, a theihmi kha philh loin a tuahmipa cu Pathian nih a tuahnak ah thluachuahnak a pek”(1:22,25) tiah a ti.