Theihmi tuahsernak

Photo Credit

Friday, October 09, 2020

Bawipa nih a vancung ram kong he pehtlai in mipi a cawnpiak hna nak hmun hma paoh ah farasi mi hna zong an i tel ve tawn i Bawipa cawnpiak nak kha a thli tein an ngai ve tawn. A raung cu Bawipa cawnpiak mi kha theih duh tak tak ding si lo in sual phawt ding tu ah an ngaih tawn.
Bawipa nih mipa pakhat sin in khuachia a tthawl tik ah farasi mi hna nih khuachia bawi beelzebul thawngin a tuah mi a si an ti. Sihmanhsehlaw, nihin thawngttha bia Lk 11:27-28 ah kan hmuh mi cu minu pakhat nih Bawipa a thangtthat nak kong a si.
Minung pakhat cio kan nun nak ah farasi mi bantukin midang thangchiat ding a kawl tu maw kan si, tthat nak a tuah tu hna kan hmuh hna tikah a thangtthat tu dah kan si.
Bawipa nih thawngttha a chim i khuachia a tthawl tik ah farasi mi hna nih Pathian sunparnak hmu lo in satan lawng an hmuh. Pathian cu an zoh ko, sihmanhsehlaw, satan lawngan hmuh.
Minu pakhat nih Bawipa kha a zoh i Pathian sunpar liannganh nak kha a hmuh i a thangtthat. Pathain kha a zoh i Pathian kha a hmuh.
Pathain bia cu kan theih leng mang cio ko cang hna. Pathian kan hmu kho cang hna maw?
Bawipa nih Pathian bia kha a thei i a zul mi cu lunglawm mi an si a ti. Kan theih mi Pathian bia kan zul cio kho cang hna maw? Kan zulh a si ah cun Bawipa nih tuah u tiah a kan ti mi kan tuah a si i cu cu thluachuah a si.
Kan zulh-tuah a si ah cun Pathian a hmu mi kan si ko hna lai. Kan tuah lo, kan zulh lo pin ah thangchiat ding lawng a kawl mi kan si ah cun satan lawng a hmu mi kan si ko lai.
Dawtmi u le nau hna Bawipa nih a kan fial mi rian, Pathian bia kan theih mi tuah khawh le zulh khawh i zuam cio hna u sih. Bawipa nih a kan dawt tuk i kan caah tthat nak lawng te a kan tuah piak hlei ah tuah ve ding in a kan sawm cio. Kan thlarau khamh kan si nak ding caah lam a kan hmuh sak, a kan cawnpiak i kan caah a nunnak tiang a pek.
Bawi nu Mary cu vancung mi thawngthanhnak a theih mi kha a zumh i cu a zumh mi cu a nunnak ah a tuah sernak in a langhter tu a si.
Tuahsernak in Bawipa cawnpiak mi “Dawtnak lam” a zul kho zungzal tu si khawh i zuam cio hna u sih. Kan mah le kan mah kan i dawt bangin midang cungah va tuah ve ding, kan thlarau khamh kan si nak hnga ding caah kan i zuam cio bangin midang thlarau khamh an si ve nak ding caah lam ttha hmuh sak i zuam cio hna u sih.