Theipar ṭha

“Cun thlaici a cheu cu vawlei ṭha ah an tla; an hung ṭhang i theifang let 100 cio an vui” tiah a ti. (Lk 8:8)

Kan nunnak ah Pathian a um lo a si ahcun zeidah san a tlaihnak a um hnga? Aa dawhmi, a ṭha i a tlingmi nun ning cu Pathian he nun ṭi lawng hi a si ko. Chawva thilri duhzat in ngei ko hna hmanh u sih law Pathian kan ngeih khawh lo a si ahcun kan nun chan hi zeihmanh sullam a ngei lo. 

Nihin ni caah Bupi nih a kan thimpiakmi cathiang (Lk 8:4-15) chungin Jesuh nih hmunli ah a tlami thlaici bianabia in a kan cawnpiak. Hmunthum i a tlami thlaici hna ṭha tein an nun khawh lonak le minung hna zong nih an nunnak ah Pathian he  pehtlaihnak an ngeih lo tikah thihnak lam panh a si nak kha a langhter. Cubantuk thlaici hna zong cu sau zong nung loin an thi zau ko hna. 

Hmuli nak i langhter mi thlaici tu cu hmunhma ṭhatnak le non ṭhatnak hmun ah a thlak caah a nung i thleipar tampi a tlainak kha a langhter. A nungmi thlaici, hmunhma ṭhatnak ah a tlami thlaici bantukin aho paoh hi theipar ṭha tampi a tlaimi si kan duh cio ko hna. Taksa lei in siseh, Thlarau lei in siseh hmunhma ṭhatnak ah a tla i thleipar ṭha tampi tlai a duhmi kan si ah cun kan nunnak ah Pathian kha kan i bochan zungzal hrimhrim ding a si. Zeicah tiah cun ṭhatnak vialte a chuahnak hrampi cu Amah Pathian kha a si caah a si. 

Bawipa Pathian he pehtlaihnak ngeih lo ahcun zeizong vialte hna hi pakpalawng men men an si ko hna. Bawipa he pehtlaihnak ngeih zungzal a si ahcun thluachuah tampi he theipar ṭha tampi tlai a si ko.