Theipar “THA”

“Cuticun nal profet hna cu an theitlai khan nan hngalh ko hna lai,” (Matt 7:20)

Jesuh nih, “A thei” tiah a timi hi zei khi dah a tu duh mi a si hnga? (Matt 7:21-23) chungah Jesuh nih: “Nan nih cu aho nan si kha kan hngal bal hna lo. Kal ko u, that lonak a tuah hna hna,” ka ti hna lai a ti. Cun (Matt 7:24-27) chungah cun lung cungah a inn a sami mifimpa bantuk si dingin a kan sawm. Mark thawngthabia chung zongah “Minung a thurhnawmhtertu cu a chungin a chuakmi hi an si. zeicahtiah that lonak ziaza a tuahtertu ruahnak thalo kha chunglei in a lung chungin a chuakmi an si: nu le pa sualnak tehna, fir tehna, mi thah tehna, va cung pa duh tehna, hakkauh tehna, that lonak a phunphun tuah tehna, lihchim tehna, zuanzam tehna, mi nahchuah tehna, mi congoih tehna, lungpuam tehna, ningcang lo khuasak tehna – hi thil thalo vialte hi minung chunglei in a chuakmi an si i minung a thurtertu cu hi hna hi an si,” tiah a ti (Mk 7:20-23). Kan chunglei ah a ummi thil hna kha lenglei in kan langhter tawn hna. 

Kan biachim ning hna le kan tuahser ning hna hi kan lungchungah a ummi theipar hna an si. Misual pakhat nih sualnak a tuah cu a lungchung in sual tuah duhnak a um chung cai cang caah a si. Mifir pakhat nih thil a fir cu fir duhnak lungthin a ngeih cia caah a si. 

Pathian duhmi theipar hna cu mithiang Paul nih hitin a langhter: “Thlarau nih a chuahtermi hna cu dawtnak, lawmhnak, daihnak, lungsaunak, zaanfahnak, thatnak, zumhawktlakmi sinak, toidornak le mah le mah i tei khawhnak tehna hi an si,” (Galati 5:22) tiah a ti. 

Pathian duhmi phunglam ning in a cawnpiaktu hna nih cun Pathian sinin an hmuhmi laksawng hna kha hmang in (Rom 12:4-8) “theipar tha” tampi an chuahter (Matt 28:19). Pawngkam a ummi hna cungah dawtnak an ngei hna i (1Jn 3:14) misual mi hna kha tangdornak lungthin he (Jeremiah 29:7) aa palhmi lam in an kirpi hna i thilhnak lam in an khamh hna (James 5:20).

Theipar tha a tlai mi hna nih cun Pathian cawnpiakmi phunglam “Keimah ka thian caah nannih zong nan thian ve awk a si” timi kha an nunnak ah an i nunpi zungzal (1Peter 1:16. 

Kan nih hna zong Jesuh hnu zultu kan si bangin a kan zoh lengmang tu Pathian siseh, midang hna si hna seh thlarau theipar tha tlai in lam tha hmuhsak kho tu le nunzia dawh in a nung kho tu si khawh i zuam zungzal ding a si.