THIANG THLARAU TUM PUAI

Voikhatnak Bible - Lamkaltu 2 : 1 - 11
Psalm - 104:1, 24, 29-30, 31, 34 (Lehnak 104:30)
Voihnihnak Bible - 1Kor. 12 : 3 - 7, 12 - 13
Thawngthabia - John 20 : 19 – 23

RUAH DING AMURU

Jesuh lo chungin voikhatnak hmasabik a chuakmi theipar cu Thiang Thlarau laksawng hi a si. Jesuh a nun lio i lo a thlawhmi cu vawlei cungmi vialte Khamhnak le lungdaih hnangamnak an hmuh khawhnak hnga tiah serhset zomhtaihnak, temhinnak in thihnak tiang a tuahmi vialte cu Pentekos ni ah a zultu pawl nih a theipar cu hmasabik le a voikhatnak ah an cohlan.

Pakhatnak Thiang Thlarau theipar cu sual ngaihthiamnak a si. Thiang Thlarau hi cohlang ko u.
Mi sualnak nan ngaihthiam ahcun ngaihthiam an si ko lai, nan ngaihthiam hna lo ahcun ngaihthiam lo an si ko lai (Jn. 20:23).

Minung cungah Thiang thlarau thianter ding ah a si.

Thiang Thlarau nih minung lungthin chungah daihnak a pek. Sualnak voikhat a tlau ahcun lung i rual lonak, lungretheihnak, ngaihchiat khuaruah harnak te hna a tlau ter dih ve.

"Nan sinah daihnak um ko seh" tiah Jesuh nih a zultu hna sinah a chim kha khuaruah har ngai biafang mitleh thiam bantuk a si. Zultuhna lungthin chungah mah biafang a vun luh tikah cun an lungthin chung aa hlummi lung i khah lonak, lungretheih vansannak le ngaihchiatnak vialte a tii dih i daihnak hnangamnak he an khat dih cio.

"Nan sinah zungzal in ka um lai vawlei caan dong tiang" Mt. 28:20. "Nan sinah" timi chungah khan nang le kei kan i tel ve maw. Fak nawn tein khuaruah a cu cang. Pentekos hi nang le kei kan Pentekos si ve cang seh.