Thihnak Teitu Jesuh

Kan Bawipa Jesuh Khrih calvary tlang cung a thih hnu ah pawngkam ummi vialte an dai dih. Farasi mi hna le Jesuh cungah nahchuahnak a ngei mi hna caah cun hna hnawhnak a kan petu a um ti lo tiin hnangam ngai in an um ko men lai. Jesuh a thih hnu ah lenglei sining ahcun a dai dih taktak mi a lo ko. Sihmanhsehlaw mi vialte an lung a dai kho taktak hnga maw?

Mi tampi cu an ngaih a chia, an khuaruah a har. Jesuh cungah zumhnak a ngei mi hna caah cun “Messiah tiah kan ruah mi cu ziah hitin a thih hnga,” tiin ngaihchiatnak he lungvaivuan in an um cio ko lai.

Nihin kan theih kan relmi cathiang (Luke 24:1-12) chungah nu a cheukhat cu thlaan ah an kal i Jesuh a tho than cang timi thawngtha an theih kan hmuh. Cu kong cu zultu hleikhat hna sinah an chim tikah zultu hna zong nih an zum kho taktak lo. Bawipa thawngthabia phuanmi kha an lung a pem khawh rih lo caah a si. Jesuh Khrih cu a tho than taktak ko cang. Vancung mi hna hrimrhim nih tehte an khan mi a si.

Thihnak in thawh than timi cu kanmah vialte hna ca zongah zumh a har ngai mi, minung lungthin le khuaruahnak nih a theih khawh lomi, a ruah khawh lomi a si caah a si. Jesuh Khrih nih, “Ka Pa chungah ka um i ka Pa cu ka chungah a um kha zum ko u. Cucu nan zumh khawh lo a si le hi thil ka tuahmi hna ruang tal ah hin zum ko u,” tiah a kan ti (John 14:11). Jesuh Khrih nih a tuah mi thil cu “Thihnak in a thawh thannak kha a si.”

Zultu hna caah ngaihchiatawk bik thil a simi kha nihin ni ah cun lunglawmh awk bik thil ah a hung cang than cang. Jesuh hnu a zultu hna le a zumtu vialte hna caah “ruahchannak nganbik” thil ah a hung cang.

Pathian thil tuahmi cu minung khuaruahnak nak in a sang deuh zungzal ko. A thil tuah ning le kan khuaruah ning hi aa lo kho bal lo, kan thei dih kho bal lo.

Kan nunnak zongah ngaihchiat nak he a khat mi thil sining tiah kan ruah tawn mi kha lunglawmhawk bik thil ah a hung cang kho ve. Jesuh cungah zumhnak kan ngeih peng a herh.

Jesuh a tho than cang timi cu kan caah ruahchannak ngan bik a si. Cucu Pathian cungah kan i ruahchan mi thil, nikhat amah he kan um ti te hna lai timi ruahchannak a si.

Easter caan ah kan tuah ve hnga dingmi cu nu hna nih zultu hna sinah Jesuh a thawhthannak thawngtha an chim bangin kan nih hna zong nih kan pawngkam ummi hna sinah kan phuan ve ding a si. Tuahsernak in kan langhter ve ding a si.