Thil hmaan cungah lunglawmhnak (Matthew 28:8-15)

Jesuh Khrih thihnak in a thothan cang timi thawngpang a theimi hna hi phu 2 an si kan hmuh khawh. Phu khat cu nu pawl an si i a dang phu khat cu thlan cawngtu ralveng pawl an si. Tlangbawi upa pawl sinah ralvengtu pawl nih thil a cangmi vialte an chimh hna tikah upa pawl cu a thin a phang i ralvengtu pawl kha tangka an pek hna i aho sin hmanh ah chim lo dingin an fial hna. Cucu thil hmaan a si mi kha thuh an duh caah a si. A thi cia mi vuipi kha meheh phaw in khuh aa timmi ko khi an lo. An caah thil hmaan a langh ding le midang hna nih an theih ding kha an tih caah a si. Midang an rak hlen mi hna a lang sual lai i, an reng le an hmunhma a tlau sual lai tiah a phan caah a si.

A dang phu khat nu pawl tu cu thil si ning tak kha zultu hna sinah a chimmi an si. Nu pawl nih an chimmi a si tiah a ter ah cun zultu hna nih an zum kho tak ve lo. Sihmanhsehlaw Jesuh Khrih a thawhthan nak kong cu a hmaan taktak mi a si caah thuh khawh a si lo. Zultu hna sin zongah a langh kan hmuh. “Jesuh nih, duak, tiah a vun ton hna i, Nan sinah daihnak um ko seh,” tiah a ti hna. Amah cu an hun zuanhnuawh i a ke an i tlaih i an biak (Matthew 28:9).

Tlangbawi upa pawl cu Jesuh a tho than cang timi thawngpang an theih ah khan an thin a phang, an ngeih a chia; sihmanhsehla nu pawl tu cu Jesuh Khrih thawhthannak thawngpang cungah khan “an thin a phangpah, an i lawmhpah” i a zultu hna va chimh awkah khan an le” tiin kan hmuh khawh. Kan nih pakhat cio hna hi teh Jesuh Khrih a thawhthan nak kongah hin kan i lawm kho taktak ve cio maw? Kan thin a phan, kan ngeih a chiat sual a si ah cun,…?