Thimnak

Nihin ni caah Bupi nih a kan thimpiak mi cathiang (Luke 6:20-26) chungin thazang i lak ṭi hna u sih. Cun hi cathiang zong hi tlawm tein ruat ṭi cio hna u sih. 

Jesuh Khrih na zumh ruangah sifah siseh, rawl ṭam siseh, lung retheihnak siseh, midang hna nehsawh-cawhdehnak siseh intuar ngam dingin ready na si cang maw? Biatak kan chim a si ahcun sifah harsat hna le, ngaihchiatnak- thabatnak si hna seh, inntuar ding timi cu a har ngai mi thil an si ko. Chim cu a fawituk ko nain zulh ding tu hi cu a har tuk mi a si.

Sihmanhsehlaw Jesuh Khrih he naih tein um kan duh tak a si ahcun hi bantuk sining hna hi cu intuar ding hrimhrim an si. Zeicah tiah cun Jesuh hnu zulh cu Amah duhnak kha zulh ding a si caah a si. Pa zeizat ko nih dah hi bantuk lam hi zulh dingin kan i timh cio cang hna hnga? Sifah harsatnak, rawl ṭam tihal nak, retheih thabatnak hna le midang hna i zuamhtaihnak timi hna hi Jesuh hnu zultu pakhat si dingah an herh taktak ko hna maw? An herh taktak ko. Zeicah tiah cun tangdornak lungthin ngeih hmasat lawngah Jesuh hnu zulh khawh a si caah a si.

Jesuh kan sin a um a si ahcun hi thil hna hi intuar khawh tuk ding lawng te an si ko hna. Zeicah tiah cun hmai lei kong, kan co te hnga ding mi zungzal nun nuamhnak kong fiang tein a kan chim kho tu le a kan pe kho tu kan sin ah a um caah a si. 

Zeitluk hmanh in rum ko hna hmanh u sih law, thil ti khawh nak rumra (Power) zong ngei ko hna hmanh u sih law, midang hna nih zeitluk hmanh in kan thangṭhat ko hna hmanh seh law, kha bantuk rumnak, thil ti khawhnak hna le thangṭhat nak hna nih khan saul nak lei ah a kan panh ter a si ahcun zeihmanh san an tlaihnak a um lo. Cun Jesuh Khrih kan sin ah a um lo a si zong ahcun kan nun hi zeihmanh san a tlaihnak a um ṭhiamṭhiam lo. Hi vawlei cung kan nun lio caan ah Jesuh i thim cu harsatnak (vailam) hna zong i thim chih in intuar khawh ding zong in timhcia ready in um ding a si.

Dawtmi u le nau hna Jesuh aa thim ko tu sining dirhmun in kan um kho cio cang hna maw?