Thla ka Cam tikah...

Photo Credit

Nihin ni zongah thlacamnak kong he pehtlai in kan ruat rih hna lai. Thlacam timi cu Pathian he kan i pehtlaihnak le Pathian kan biaknak a si. Pathian sin thla kan cam tikah ningzah loin, lungsau tein le ruahchannak nganpi he kan cam ding a si timi kong he pehtlai in nihin ni caah Bupi (Lk 11:5-13) cathiang chung in ruah tti dingah a kan sawm.

Ningzah lo tein
“Ka kawi, changreu hlum thum in ka cawi ta ko. Ka kawipa pakhat khual a tlawng i ka inn ah atute ah khan a ra chuak i pek awk zeihmanh ka ngei lo”(vs. 5-6). Zaan tlai hnu ah innpa hna sin va kal riangmang i eiawk rawl va hal timi cu ruah ah cun a sullam a ngei tuk lomi a si. Mah inn te ah chumh piak ko i pek ah a ttha deuh hnga lo maw?

Nihin Cathiang chung kan hmuh mi ah: “Hna ka hnawh hlah, innka ka hrenh cang i ka fale he kan it cang, nangmah thil pek awkah ka tho kho ti lo” tiah a leh mi zong kan hmuh. Jesuh nih a kan chimhmi cu, “Amah cu na hawi a si ruangah a tho in na herhmi changreu kha an pe lai lo nain ningzak loin na hal peng hrat caah khan, na herhmi paoh cu an pek ko lai” tiah a ti.

Jesuh Khrih nih Khrihfa mi vialte a kan cawnpiak mi cu, kan herh hringhran mi, kan herh taktak mi hna kha Pa Pathian sinah ningzak lo tein hal zungzal ding ti hi a si. Innka hrenh cang mi innchung in “Hna ka hnawh hlah” timi thei hmanh u sihlaw Bawipa nih “hal u, kawl u, king uh” tiah a kan fial. Kan herh taktak mi thil a si ah cun ningzah ding zeihmanh a um lo.

Lungsau tein
“Hal u law pek nan si lai; kawl u law nan hmuh lai; ing u law innka cu hunpiak nan si lai”(v. 9).

Khrihfa mi hna nih thla kan cam tikah lungsau tein kan cam ding a si. “Hal u, kawl u, king u” timi biafang hna hi ka zoh tikah lung dong lo tein thla kan cam zungzal ding a si timi hi fiang tein kan hmuh khawh. Voikhat lawng hal i ngol a hmang mi si u sih law kan hal mi kan hmuh lo tikah kan lung a dong sual lai.

Ruahchannak nganpi he
“Zeicahtiah a halmi paoh cu pek an si lai i a kawlmi paoh nih an hmuh lai, a kingmi paoh cu innkhar kha hunpiak an si lai”(v.10)

Khrihfa mi hna nih thla kan cam tikah ruahchannak nganpi he cam ding in Jesuh nih a kan cawnpiak. “Nannih hringtu pa hna lakah, nan fale nih nga an in hla hna ah, rul a pemi nan um hnga maw? Arti an in hal hna ah tah tlangngaikuang nan pe hna hnga maw?” tiah Jesuh nih pek hrimhrim ding kan si nak kong fiang tein a chim. Pathian he aa ralchanmi hna lawng nih thil ttha lo kha kan cungah an tlunter; sihmahsehlaw Pathian cu kan caah thil ttha bik a kan pe zungzal tu a si.

Jesuh Khrih nih a chimmi ah minung a simi hna hmanh nih dawtnak an langhter khawh a si ah cun a kan sertu Pathian chinchin nih cun a kan dawt chinchin lai timi zong theih ding a si. “Hi tluk i nan tthalo ko na in nan fale kha thil ttha pek cu nan hngalh ahcun, vancung i a ummi nan Pa nih cun amah kha Thiang Thlarau a halmi cu zeitluk in dah a pek chinchin hna lai” tiah a ti.

Cuasicaah, ningzak lo tein, lungsau tein le ruahchannak nganpi he Pathian sinah kan herhmi hna kha hal hna u sih, chim hna u sih, thlacam zungzal hna u sih.

Add new comment

4 + 11 =