THLACAM NUN(2)

BIATAK TE-IN THLACAM.
Thlacamnak ah biafang a tlawm le a tam biapi a si tawn lo. Biatak te-in le lungtak te-in thlacam cu a biapi ko. (Jame 5:17) Elizah nih biatak te-in thla a cam i kumthum le a cheu ruahsur lo in a um. Biatak te-in kan sinah thla an cam tikah a thlacam a dih hlan hmanh in ka leh hna lai tiah Pathian nih a ti. (Is. 65:24) Khrihfa mi nih biatak te-in thla kan cam tikah kan mitthli a tla ttheu. Zeicatiah Jesuh Khrih a temhinnak le a thihnak kan ruah. Jesuh nih kanmah caah Gesmani dum chungah mitthli he thla a camnak kha ruat tuah.

SUALPHUAN HNU THLACAM.
Sual phuan hnu in Pathian sinah thla a cam mi vialte cu a ngeih piak hna i, a leh hna. Sualnak cu lungchung ah a thup peng ahcun cu thlacamnak cu Pathian nih a ngeih piak lo i, a leh zong a leh lo. (Ps. 66:18) Ka sualnak kha rak thup peng ning law, ka thlacamnak cu a rak ka ngaihpiak hnga lo. Sualphuannak nih a dingmi ah a ser. Bawipa nih a dingmi cu mit in a ven hna i, an thlacamnak kha a ngaih zungzal (1 Peter 1:3-12).

PATHIAN DUHNING IN THLACAM.
Pathian duhning in thla kan cam ahcun kan halmi poh kha a kan pek hrimhrim lai ti kha kan zumh caah Pathian cu ttihnak zeihmanh um lo in kan fuh ngam. (1John 5:22) Amah Pathian duhnak a si mi a nawlbia kha ngai law a lungtlin khawhnak hnga lungtak te-in kawl. Jesuh nih Gesmani dum i thla a cam tikah keimah duhnak si lo in nangmah duhning in si ko seh a ti. (1John 3:22) Amah nawl kha kan ngaih ca le a duhmi kha kan tuah caah kan halmi poh kha kan hmuh.

THIANG THLARAU HRUAINAK IN THLACAM.
Thiang Thlarau bawmhnak hmuh duh in thlacam usih. Thiang Thlarau a hal mi poh cu Pathian nih pek lo in a um hna lo. (Luke 11:23) Thiang Thlarau hruainak in thla a cammi hna cu Pathian nih a ngaihpiak hna. Thiang Thlarau nih cun zeitin dah thlacam ding a si ti le zeicadah thlacam ding ti kha a chimh hna (Efesa 6:18; Rome 8:26-27).

JESUH MIN IN THLACAM.
Kan Bawipa Jesuh nih ka min in nan halmi poh kan tuahpiak hna lai a ti. (John 14:13-14) Amin `hawnnak in hal ding kha a tu le tu chimh kan si. Jesuh min kha va lak hmanh u, ngaihchia mi lungrethei hna, nang kha hnangam nak an pek lai. Tukforhnak nih an naih tikah a min khan thlacam, teinak na hmu lai, na kalnak kip ah Jesuh min keng tuah.
Thlacamnak nih a thilti khawhnak le khuaruahhar a sinak tthawnnak kha thla a cam mi hna nih an teh i an hmuh. Cucaah Zumtu Khrihfa hna nih thlacam nun kan ngeih a si ah cun pumpak nun a tthang lai i Pathian ram zong a kau lai.

Catial tu/- Saya Albert Cung Nawl