Thlacamnak

“Lungdong loin thla nan cam zungzal awk a si, ti cawnpiaknak caah Jesuh nih hi bianabia hi a chimh hna.” (Lk 18:1)

Nifatin kan nunnak ah thlacamnak lei he pehtlai in kan dai tlang sual hna maw? Khrihfa kan si hna caah thla a cammi kan si cio lai timi cu a fiang ko. Sihmanhsehlaw “nihin thla ka cam maw?” timi hi biatak tein le pheh lo tein mah le mah i hal hmanh hna u sih. “Zeibantuk lungput in le sining dirhmun in dah Pathian sinah thla ka cam” timi zong hi a biapi ngai mi a si fawn. Thla kan cam dih hnu ah teh zeihmanh tuah loin, um sawh ko in maw “Pathian nih zeitik ah dah ka thlacam a ka leh te lai” timi caan kha a hngak sawh mi dah kan si. 

Nihin ni caah Bupi nih a kan thimpiakmi cathiang cu Luke 18:1-8 a si i hi cathiang chungah hin biaceihtu bawi pakhat le nuhmei pakhat bianabia in, “Lungdong loin thla nan cam zungzal awk a si,” timi Bawipa nih a kan cawnpiak nak kha kan hmuh khawh. 

Pathian sin thla kan cam tikah tangdornak lungthin kan ngeih a herh (Ps 10:17, Proverbs 15:25). Zeicah kan ti a si ah cun Pathian sin in thluachuah hmuh kan duh caah a si. Nuhmei nu nih zeibantuk thil sining dah a ton timi cu kan thei lo. Sihmanhsehlaw lungdong loin a halchihmi thil a si caah nuhmei nu caah a biapi tukmi thil a si lai timi cu a fiang ko. Cun hitin lungdong loin biaceihtu pa sinah a hal lengmang caah a donghnak ah cun biaceihtu pa nih “Pathian cu ka ṭih lo i minung kha ka hmaizah hna lo nain, hi nuhmeinu nih hin hnahnawhnak a ka pek lengmang caah a bia cu ka ceihpiak ko lai, cu lo ahcun a ra lengmang ko lai i ka re lam a ka theihter chin lai,” tiah a ti i nuhmei nu duh mi a tuah piak timi kha kan hmuh.  

Nuhmei nu hi santlai lo tiah ruahmi si ko hmanh sehlaw, a hmaanmi thil caah lungdong loin a hal tikah a ding lomi biaceihtu hmanh nih a dohnak ah cun a dik ning in bia a ceih piak ko. Hi zawn ah hin kan theih hnga ding mi cu “thildik, thilhmaan a si ahcun a donghnak ah teitu a si” timi kha kan hmuh khawh fawn rih.

Mithiang James nih Pathian sin ah thlacam ding le kan duh kan herh taktak mi hal ding a biapit ning kha hitihin a ti ve: “Thil nan duh, sihmanhsehlaw nan ngei kho ṭung lo, cu tikah mi thah nan ngamh; thil ngeih kha nan duh, sihmanhsehlaw nan hmu kho ṭung lo, cu tikah nan i si i nan i vel. Nan duhmi kha Pathian nan hal lo caah nan hmu lo,” tiah a ti (James 4:2). 

Cuasicaah dong lo tein le lungsau tein Pathian sinah thla kan cam zungzal ding a si. Cun nuhmeinu nih a biaceihtu pa a hal lengmang bangin thla zong kan cam lai, tuahsernak zong in kan i zuam ding a si fawn. “Pathian cu kanmah lei i a ṭan ahcun aho nih dah an kan doh khawh lai?” (Rom 8:31) tiah mithiang Paul nih a ti bangin Jesuh kan sin a um a si ahcun taksa lei in siseh, thlarau lei in siseh teinak kan hmu zungzal ko lai. Thlacamnak in Jesuh Bawipa he i hawikomhnak fehter chinchin hna u sih; Jesuh kha naih chinchin hna u sih: “Pathian cu naih u law an naih ve hna lai” (James 4:8). Jesuh nih a kan ṭanhpi zungzal nak hnga ding caah amah sinah bawmhnak hal zungzal hna u sih; i bochan zungzal hna u sih.