Thlahnak le thlah-ding

“Atu ah i thawh u law kal u. Nannih cu cenghngai lak i tufa thlah bantukin kan thlah hna.” (Lk 10:3)

Nihin cu Bupi nih thawngṭhabia ṭialtu mithiang Luke puai a kan tuah piak. Luke min aa lak mi kan theih hngalh mi vialte hna ca zongah nihin ni ah hin a bik in thlacam piak hna u sih. Nihin thawngṭhabia chungah kan theih mi cu Jesuh nih zultu 72 hna kha a kal lai nak khua ah a thlah hna nak kong a si. Hi 72 hna nih hin Jesuh a kal te lai nak khua hna ah kal in Jesuh a phanh tikah zeizong te timhcia in an um nak hnga ding caah lamsial cia khi a si. 

Jesuh nih a thlah hna tik zongah zeitin um ding, tuah hnga ding mi hna tuah ding le bia an chim hnga ding mi vialte hna zong kha tling tein a chimh cia fawn hna. An khualtlawn nak zongah thilri tlawm te lawng i put ding, tangka siseh, hrukaih ding thilpuan siseh, pha-nah siseh, an herh takmi te lawng kha i put dingin a fial hna. 

Khual-tlawn tikah tangka loin tlawn-kal cu a fawi bak lomi thil a si lai timi na ruat bal maw? Tuchan ah zung pakhat khat in khual tlawn an fial hna tikah lam ah hman ding an herh hnga dingmi rawl-einak man  tibantuk caah an dih taktak mi nak in a let in a hal mi hna zong an um ko lai. Sihmanhsehlaw Jesuh nih cun zeihmanh a pek hna lo pin ah tangka zong a put ter hna lo. Pathian lawng kha i bochan ding le an herh mi cu Pathian nih a timh piak te ko hna lai timi cungah zumhnak ngeih ding tu lawngin khan a cawnpiak ko hna. 

Hitin Jesuh nih a fial hna tikah hin zultu hna nih zeitin dah Jesuh kha an lung chungin an ruah hnga i bia in an leh hnga; Jesuh kha a mawhchiat hnga maw? Phaisa tlaitu Judas Iscariot (Jn 12:5-6) zong nih teh zeitin dah a hawi dang zultu hna kha a ti hna hnga? A thli tein teh an i put hnga maw? 

Kannih Khrihfa mi hna zong Jesuh nih a thlah mi lawng te kan si ko hna. Hlaan lio i zultu hna sinah Jesuh nih, “Pahisa bawm siseh, zal siseh, kedan siseh i phorh hlah u; lampi ah ahohmanh biakchawnh awkah dircon hlah u,” tiah a rak chimh hna bang khan tuchan zongah a kan chimh cio ko. 

Mission rianṭuan ah ka kal lai tiah kan ti tikah bawmtu chawva, sponsor a kan tuahpiaktu hna kan kawl hmasa hna maw? Sponsor tuahpiaktu kan i hmuh lo tikah teh mission hi kal loin maw kan um? Mission rian kan ṭuannak ah zei khi dah a bikin midang hna sinah chimphuan ding kan i timh mi le kan duh mi a si?