Thlarau Rawl

“Jesuh Zultu Taktak”

“Ka cawnpiaknak kha nan zulh ahcun a ka zultu taktak cu nan si; biatak cu nan hngalh lai i biatak nih cun an luatter hna lai.” 2021 March 24 (Cacawn Nithum) ni thawngṭha chimnak.

Hakha RVA in thawngṭha a ngaitu Khrih ah dawtmi nu le pa, u le nau hna, Bawipa nih taksa thlarau ngandamnak, hnangamnak in pe cio ko hna seh. Nihin kan ral hngami Bible, Pathian bia hna, he thlarau thazaang la ti hna u si tiah sawm kan duh hna. Pathain a zumtu taktak, Jesuh Khrih a zultu taktak cu a ho hna dah an si. Kan mah tah Khrih a zultu taktak kan si maw? Zei tluk tiang tah kan zum i kan zul cang ti kha ni hin ah a thar in ruat ṭhan hna u si. Nihin kan rel hnga mi Bible hna cu Daniel 3:14-20, 24 -25, 28 a si i siangpahrang Nebukhadnezzar nih milem baik awk ah nawl a chuah mi kha Daniel i hawi le hna a si mi Shadrak, Meshak le Abednego hna nih khan kan Pathian lo a dang pathain kan bia lai lo tiah a nawl ngai duh lo in an um caah meiphu chungah an paih. Natein Pathian nih a khamh hna i zeihmanh an cang lo nak kong a si.

Gospel cu Johan 8:31-42 tiang a si i a tu ah kan rel piak hna lai. Johan 8.31-42 Jesuh nih amah a zummi Judah mi hna kha, “Ka cawnpiaknak kha nan zulh ahcun a ka zultu taktak cu nan si; biatak cu nan hngalh lai i biatak nih cun an luatter hna lai,” tiah a ti hna. Annih nih, “Kannih cu Abraham tefa kan si i aho sal hmanh kan si bal lo. Cucaah nan luat lai, na ti tikah hin a sullam zeidah a si,” tiah an leh. Jesuh nih cun a thawh hna i, “Biatak kan chimh hna: a sualmi paoh cu sualnak sal an si. Sal cu innchungkhar chungah khan zungzal in a um lo, sihmanhsehlaw fapa kha cu zungzal in a um. Fapa nih nannih kha an luatter hna ahcun nannih cu nan luat taktak lai. Abraham tefa nan si cu ka hngalh ko. Asinain kan cawnpiakmi hna kha nan cohlan duh lo caah keimah cu thah nan ka zalh. Ka Pa nih a ka hmuhsakmi kong kha ka chim, sihmanhsehlaw nannih cu nan pa nih an chimhmi hna kha nan tuah,” tiah a ti hna. Annih nih, “Kan pa cu Abraham kha pei a si cu,” an ti. Jesuh nih cun, “Abraham tefa kha nan si taktak ahcun, amah tuahmi kha pei nan tuah ve hnga cu. Chimh kan zuam lengmangmi hna cu Pathian sinin ka theihmi biatak kha a si. Asinain nannih nih cun thah tu nan ka zalh. Cu bantuk cu Abraham nih zeihmanh a tuah ṭung lo. Nannih cu nan pa i a tuahmi kha nan tuah,” tiah a leh hna, Annih nih cun an i thawh i, “Pathian lawnglawng pei kan Pa cu a si ko cu. Lakfa kan si ṭung lo, a fa taktak pei kan si cu,” tiah an leh. Annih cu Jesuh nih, “Pathian kha nan Pa rak si taktak seh law cu keimah hi nan ka dawt ko hnga, zeicahtiah kei cu Pathian sinin a rami ka si i atu hika ka phan. Keimah duh in a rami ka si lo, amah nih a ka thlahmi ka si. (Bawipa thawngṭhabia a si.)

Nihin kan rel mi Bible hna kan zoh a si ah cun Pathian kan zum, Pathain fa kan si kan ti tikah kan tuahnak, kan dirpi nak nih tette a piah hau ti kha kan hmu kho. Veikhatnak kan relmi chungah Shadrak, Meshak le Abednego hna cu kan thi zongah a poi lo ka Pathain lo cu a dang pathian kan bia lai lo, kan thi zongah a poi lo tiah Pathian lei ah an dir ngam, an nunnak in tette an piah. Mah hi zumtu taktak kan ti mi cu a si. Gospel chung zongah Pathain fa taktak, zumtu taktak, Jesuh Khrih zultu taktak si awk ah zei dah a herh tikha kan hmu kho. Bawipa Jesuh nih “Ka cawnpiaknak kha nan zulh ahcun a ka zultu taktak cu nan si; biatak cu nan hngalh lai i biatak nih cun an luatter hna lai” tiah a ti. Cun Abraham fa kan si, Pathain fa kan si nan tiah cun ka lawng le zum sawhsawh lawng a ngah lo i tuahnak in langhter a hau ti zong kha Bawipa nih a chim. Cuasicaah dawt mi nu le pa, u le nau hna, Jesuh Khrih zultu taktak si kan duh ah cun zei poh kan tuah ah Bawipa nih a kan cawn piakmi hna kha zoh in a kaih maw kaih lo ti kha zoh peng kan hau lai. Tahchunnak ah Bawipa kan bo chan, Bawipa teinak kan pe ko tiah thla kan cam, na tein khat lei ah Bawipa nih a kan cawn piakmi dawtnak, ngaihthimnak tibantuk tuah kan duh lo, zul khawh ding a tim zong kan tim lo a si ah cun Bawipa kan bo chan kan timi hi kan ka lawng in kan bochan tinak a si lai. Cuasicaah Bawipa bochan mi kan si ah cun Bawipa nih zei tin dah a kan cawn piak timi hna kha zoh in cawlcang kha i zuam peng hna u si. Cu lawnglawng ah kan Bawipa Jesuh i zultu taktak kan si kho lai. Bawipa cu biatak a si. Biatak a si mi Bawipa i lam kan zul ah cun mah biatak nih khan luatnak taktak cu a kan pek lai. Bawipa nih thlua in khuah cio ko hna seh.

Fr. Peter Lal Zin Thang (Hakha Diocese)