Thlau le Hmuh

Photo Credit

 

  • A caan ah mah ruahnak lengin midang sinin cohlaan le sunsak nan ton tik ah zalong in nan um thiam cio hna maw? Minung hmuh ningah mi sual an si tiah ruah mi hna kha kan Bawipa Jesuh Khrih nih hawikom bangin a cohlaan hna tikah frasi mi le phungbia cawnpiak tu hna cu tha tein um thiam lo i Bawipa cungah sual phawt ding lawng khua an khan tawn. Zeicah tiah cun farasi mi hna cu mi sual mi hna he i hawikomh a si ah cun Pathian hmai ah kan thiang sual lai lo tiah a ruat mi an si caah a si.
  • Midang cungah Pathian muihmai zoh in dawtnak lungthin he a cohlaang mi na si cang maw? Bawipa Jesuh nih mi sual hna tiah an ruah mi hna he rawl dum tinak siseh, i cawnpiak nak a tuah ah siseh frasi mi hna nih an hmuh tikah an khuaruah a har ngaingai. Sihmanhsehlaw, frasi mi hna nih an philh sual mi le an i thiehter duh lo-hmuh ter duh lo mi cu, Bawipa cawnpiak mi Pathian zangfahnak kong hi a si.
  • Bawipa tuahser ning le a nun zia in a cawnpiak mi hna cungah frasi mi nih bia hal nak an tuah tikah Bawipa nih tahchunhnak bianabia in a leh mi hna cu “Tuu tlau kong”, “Tangka tlaukong”, tbk,…in a leh tawn hna. Zeicahtiah cu bianabia chungtel hna cu minung nunnak caah a biapi mi an si caah kawl cio mi le ngeih cio dingin duh cio mi an si bantukin, cu bianabia hmannak thawngin Pathian zangfahnak le khamhnak kong fawi tein in kan theihthiam khawh nak hnga ding caah a si.
  • A tlau mi kawl than ding le hmuh tikah remh than dingin Bawipa nih a kan duh piak cio. Pathian nih a kan pek mi nun zia dawh te hna, dawtnak le lungthiang tein pakhat le pakhat kan palhnak i ngaihthiam in midang hna sinah Pathian muisam kan langhter khawh nak hnga ding te hna,… mah bantuk hna hi Bawipa nih a kan duh piak mi cu an si.
  • Minung sining in kan thlau tawn mi hna cu mithiang Paul nih fiang tein a langhter ve. “Minung sining nih a tuah tawnmi cu a fiang ko: nu le pa sualnak tehna a thurhnawmmi thil tehna, aa dawhcah lomi thil tehna, siasal biak ehna le dawih le eih tehna hi an si. Pakhat le pakhat an i ral, an i do, an i nahchuah, an thin a hung anmah zawn cio lawng an ruat, an i then, ziar an i ngeih, zu an ri, an au an khuang i cu bantuk thil a dang tampi khan an tuah lengmang hna” tiah (Gal 5:19-21) ah a ti.
  • Bawipa nih a tlau mi hna kha a Bupi chungah luh ter than ding le lawmhpi ding a duh. A tlau mi hmuh than an si i lunglawmhnak a um ning kong kha Bawipa nih a ti mi cu: “A hmuh tikah a hawikom hna le a innpa hna kha a auh hna i, ‘Ka lawmhpi u, zeicahtiah ka thlaumi ka tangka kha ka hmuh than cang’ (Lk 15:9) ‘aa ngaihchihmi misual pakhat ruangah Pathian vancungmi hna cu an i lawm’ tiah a ti”(Lk 15:10).

Add new comment

9 + 2 =