Timhcia tein Um

"Cucaah nan Bawipa a rat lai ni nan hngalh lo caah ralring tein um ko u." (Matt 24:42)

Rian pakhat khat cungah ṭuanvo ngeitu hei si law, asiloah, rianṭuannak ah tlangtla tu hei si law cu an in pek mi rian cu zeitindah na tuahnak hnga?

Na rian ṭha tein na lim khawhnak hnga ding caah a si khawh chungin nai zuam ko lai. A herh tuk lomi hna cungah na caan na hmang hrimhrim hna lai lo timi cu a fiang ko.

Nihin thawngṭhabia kan rel kan theih mi (Matt 24:42-51) chungah Jesuh nih Mi Fapa ruah lo pi in a rat lai nak kong kha zultu hna sinah a chimnak kong kan hmuh: “Mi Fapa cu nan i rin lo caan ah khin a ra ko lai.” Jesuh Khrih nih zultu hna leikap in zeibantuk timhtuahnak ngeih ding khi dah a duh mi cu a si hnga? A fiang ko, Amah (Jesuh) a nun bantukin khan nun ve ding kha a si ko. Jesuh nih mi vialte hna caah a nunnak a pek bang khan pakhat le pakhat cungah dawtnak lungthin he i bawmh, i zohkhenh kha an si ko. 

Zeibantuk timhtuahnak dah kan ngeih a herh? Chawva kawl hawlnak lawngin maw kan caan kan donghter lai? Sinaisai hlah. Jesuh Khrih nih i timhtuah cia tein um ding a kan duh piak ve mi cu zultu hna sinah a rak chim bang, amah nunzia i cawn ve ding kha a si ve ko. Zeicah tiah cun Jesuh nih kan lungthin innka a hung kink tikah fawi tein kan cohlaan khawh i hmunhma kan pek khawhnak hnga ding caah a si. 

Cuasicaah chawva kawl-hawl nak le taksa duhnak tlinh ding lawngah hin kan caan liamter hna hlah u sih. Mit hmuh thilri chawva hna le sining hna cu a hmun mi thil le sining an si lo. Jesuh Khrih kan sin a rat tik caan caah a ṭha bik mi sining in timh tuahnak kan ngeih khawh dingmi cu Jesuh Khrih caah caan pek nak lawngin hin a si kho mi a si. 

Zeitluk hmanh in kan rian tam ko hmanhsehlaw Jesuh Khrih caah kan caan pek khawh ding in le kan thlarau caah timhcia tein um khawh i zuam zungzal hna u sih.