Timhcia um

Photo Credit

Luke 12:36-38

  • Kan Bawipa Jesuh Khrih hi vawlei in vanram ah a kal lai i nikhat khat ah a rak rat than te lai nak konglam he pehtlai in a hnu zultu hna sinah bia a cah ta mi hna “ralring tein um zungzal u” ti mi kong hi nihin kan theih mi a si.
  • Nan mah caah hmunhma remh dingah ka kal lai. Kei mah ka um nak hmun ah nan nih zong nan um ve nak hnga ding caah ka rak kir tthan lai i ka rak in don hna lai tiah a ti.
  • Kan Bawipa Jesuh nih a chim chung mi bia vialte hna cu an hung tling tak tak ko hna. Tahchunnak ah, Judas Iscariot nih a ka rawi te lai tiah a ti mi zong a hung tling taktak. Peter zong nih ar a khuan hlan ah voi (3) tiang na ka hlawt te lai tiah a ti mi zong a hman tak tak. An ka tleih an ka khih lai i an ka thah lai, sihmanhsehlaw, nithum nak ni ah ka tho tthan lai a ti mi zong a hman tak tak mi a si.
  • Kan Bawipa nih ka rak ra tthan te lai a ti mi cungah hin tah lung awtawmhnak na ngei kho rih ko lai maw? Ka rak ra tthan te lai tiah a ti mi hi kan nih hna nih a ni caan rel in hngah ding cu a si hrim hrim lo. Timhtuah cia tein kan um zungzal nak hnga ding caah ralrinnak a kan pek mi a si ko.
  • Kan Bawipa a rak rat tthan ni caan caah a ttha bik in kan mah hna nih timhtuah nak kan ngeih ding a herh mi cu Bawipa Pathian a cawnpiak mi vialte kha ttha tein kan ngeih i kan zulh ding hi a si. Bawipa a rak rat tthan ni cu ruah lo pi zongin a si kho, hmakhat te zong a si kho. Zeitluk in dah a ran lai tiah cun, cu tik caan ah cun sual ngaihchih caan hmanh ngeih khawh a si te lai lo.
  • Cu a si caah dawt mi u le nau hna, kan nunnak kha Pathian sin ah up u sih law Bawipa Pathian i lunglawmhnak thawngttha bia kha zungzal in cohlang u sih law ngai zungzal ko hna u sih. Bawipa Jesuh nih a chim mi thawngttha hna cu “Lunglawmhnak thawngttha bia” tiin a ti bantukin a cawnpiak mi vialte ttha tein a zul mi vialte cu hmanungbik ni caan ah an lung aa lawm tak tak te ko lai.
  • Cu a si caah, “An bawipa nih inn a phak tikah i hlau le ralring tein a rak ummi a sal hna caah cun lunglawmh awk a vas i dah! Hihi kan chimh hna: a taisawm kha aa sawmh lai i a tthatter hna lai i a bultawl hna lai” tiah (Lk 12:37) a ti bantuk khan kan nih vialte hna zong i hlau tein le ralring tein kan Bawipa a rat lai ni kha hngak zungzal hna u sih.
  • Bawipa dawtmi zumtu hna nan dih lak cungah Pathian Thlauchuah um zungzal ko seh.

Add new comment

1 + 13 =