Tinhmi

Photo Credit

University pakhat ah Theology a cawnpiaktu siangbawi pakhat a rak um. Nikhat cu sianghngakchia pakhat nih siangbawi pa cu bia a hal: 

Sianghngakchia pa : “Father pa, zeiruangah dah Khrihfa na si?”

Father pa : “Thawhthannak a um caah.”

Sianghngakchia pa : “Zeiruangah dah Catholic zumtu na si?”

Father pa : “Bawipa Thisa a um caah.”

A si. Bawipa Thisa (Eucharist) cu Bupi cawnpiaknak ah “Khrihfa nunnak a hramthawhnak le a sangbik” “source and summit of the Christian life” (ccc. 1324) tiin a langhter. Lamkaltu hna nih thawngthabia an phuan tikah Jesuh Khrih min in an phuan i miphun kip kha an rak cawnpiak hna. Cucu nihin ni tiang pehzulh in tuah mi a si. 

Tipil petu Johan a cuarpar tan awk ah an kalpi lioah  a pa Zachariah nih vancung mi phuanmi min “Johan na sak lai” (Lk 1:13) timi min ca in a tial hnu lawngah a holh khawh than kha kan hmuh (Lk1:64). Cucu Pathian tinhmi minung nih el khawh lo a sinak kha faing tein a langhter nak a si. Pathian duhnak kha hmai kan kal ter a si ahcun teinak le khuaawng tonnak a si. Mah duhnak lawng hmailei kan fonter hmasat a si ahcun sunghtlak nak a si.

Zachariah le a nupi Elizabeth cu kum upa ngai cang mi an si ko nain “kan fapa Johan nih kan zoh te seh,” timi lungput an ngei lo. Pathian nih a timhcia mi, a kawh cia mi an fapa duhnak tu kha tha tein a kilkawih piaktu an si. “Ngakchia cu a hung thang i thlarau in a thawngmi a si; Israel mi zapi sinah a hun i langh hlantiang thetse ram ah cun a um,” tiah Johan kong he pehtlai in kan hmuh khawh fawn (Lk 1:80). 

Dawtmi nu le pa hna, nan fale kha zeibantuk pungsan in dah nan thithruai cio hna? Siangbawi cannak sianginn kai an i timh, an duh tikah nan thloh sual hna maw? “Fapa pakhat te lawng na si, kan nih kan hung upat tikah a kan zohkhenhtu an um lai lo, kal duh hlah,” tiah nan ti sual hna maw? “Fanu pakhat te lawng na si, Sister siding in kan in siang hrimhrim lo,” tiah nan ti sual hna maw? Ruat hmanh u!

Ka fapa fanu cu a hung upat tikah “engineer a si lai, doctor a si lai” timi tinhnak lawng kan ngeih sual a si ahcun “mah duhnak kha hmasabik ah a chia tu kan si sual lai.” Pathian nih kan fanu kan fapa hi zei lei kap in dah a auh ning a si timi theihhngalhnak kha kan ngeih hmasat a si ahcun Pathian duhnak kha hmai ah a chia hmasa kho tu kan si ko lai.

Jesuh Khrih nih: “Zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek thiamthiam ko hna lai,” (Matt 6:33) tiah a kan timi kha philh hna hlah u sih.

Add new comment

1 + 14 =