Tipil innak le thlahnak

Kawlram catholic Khrihfa ngakchia phu (missionary childhood) hna nih angki (T-Shirt) an chuah i an tlangtar  “moto”ah “Baptized and sent” tiin an angki cungah an cuanter. Ngakchia tete an si ko hna na in zeiruangah dah hi bantuk moto hi an i lak hnga tiin khua ka ruat tawn.

Ttha tein khua kan ruah hna a si ah cun kan nih pakhat cio hna hi tipil in nak kan hmuh hnu in thlah mi kan si cio hna. Tipil in nak thawngin sualhram in thianhpiak kan si hna i Pathian fanu/pa dirhmun kan phanh tthan hlei ah Jesuh hnu zultu dirhmun in mission rianttuan ding caah thlah mi kan si cio hna. Vawlei cung i khual a tlawng cuahmah lio mi bupi hi mission rianttuan ding caah zultu dirhmuh in thlahmi a si.

Siibawi (doctor)pakhat nih mizaw zohkhenh ding le thlop ding hi a rian le aa nunpi mi a si bangin, mission rianttuan ding hi bupi nih aa nunpi mi a rian a si ve. Mah bantuk thil sining cu tthen khawh lo mi sining a si.  Mission rianttuan ding hi siangbawi, sister, pastor (saya) te hna lawng nih an ttuan ding mi rian a si lo. Tipil nak a ing cang mi Khrihfa pakhat cio nih zultu hna bangin mission rianttuan ding caah rian (tavuan) pek kan si cio hna.

Mithiang Paul nih: “Vawlei a ser hlan in Pathian nih kannih cu Khrih chung i amah ta si dingin a kan thim cang, cucaah a hmaiah a thiangmi le soi awk um lomi kan si awk a si”tiah Pathian thim cang mi miphun kan si nak kha (Eph 1:4) chung in kan hmuh khawh. Tipil nak kan in hnu cun mission rianttuan ding caah thlahmi kan si. Khuazei in dah kan thawk hna lai? Mi zei hna sinah dah kan kal lai? Hlatpi in ruah a hau lo. Mah umnak chungkhar tein hin thawk ding a si ko. Pathian duh ning in nun-kal, chimrel ding a si ko. Pathian dawtnak kha midang cungah kan nunnak in langhter ding a si ko. Cutin kan nun khawh a si ah cun vawlei cungah Pathian Pennak kan tlunter khawh ko lai.