Tthatlonak in kan Khamh tuah

Luke 11:1-4

• Nifatin ka nunnak ah hin zeibantuk tthat lo nak hna nih dah kan mit a kan huh tawn i Bawipa ser mi pawngkam aa dawh ning le a tthat ning hna hmuh kho lo in a kan tuah tu hi zei dah an si tawn?
• Thil sining cang lo le biahmaan lo in midang kha sual palh nak lam ah a phanhter tu kan si sual maw? Pathian nih a kan ser ka ah cun, minung sining in kan chuah ka ah cun duh a nung tuk mi le dawt awk aa tlak tu mi kan si cio. Sihmanhsehla, hakauhnak le duhfah nak nih Adam le Eve a rak tei hna bangin kan hun upat deuh in sual palhnak lam kan zawh sual tawn. Bawhte kan si lio bangin duh kan nung ti lo, dawt awk aa tlak ngai mi kan muisam zong duh sah in an tlau hna.
• Mithiang Paul nih: “Thawngṭha biatak lam ding kha an zul ti lo ti ka hmuh tikah, an dihlak hmaiah Peter cu ka thawh i, “Nang cu Judah mi na si, sihmanhsehlaw Jentail mi bantukin na um, Judah mi um in na um lo. Cucaah zeitindah Jentail mi cu Judah mi bantukin nan um lai tiah na hnek khawh hna lai?” ka ti, tiah a ti.
• Khrih hnu zultu hna hmanh nih Khrih cawnpiak ning in an rak nung kho dih lo. Zangderank, ttih phannak, mi soisel tuar ngam lo nak zong an rak ngei tak tak ve. Sihmanhsehlaw, mithiang Paul nih cun: “Nunnak hi ka caah zeidah a si? Kei ka caah cun nunnak cu Khrih a si ko. Cucaah thihnak nih hin a ṭha deuh chinchinmi thil hmanh a chuahpi lai” (Filipi 1:21) ah a rak ti bang khan a nunnak ah Khrih cawnpiak ning in a rak nung, Pathian duh ning in a rak nung mi a si bangin, mi thleidannak zeihmanh ngeih lo dingin Peter kha mi vialte hmah ah a rak mawhchiat ngam kha a si.
• Dawtmi u le nau hna, nang le kei tah mi thlei dan a hmang mi kan si sual maw? Mah chungkhar nun khua dawh nak ca lawngah rianttuan in midang mitthli a tlak ter tu kan si sual maw, ruat cio hna u sih.
• Bawipa nih thlacam ning a kan cawnpiak mi ah “Tthat lo nak in kan khamh tuah” tiin thlacam ding in a kan fial. Kan chim kan rel nak in “Bawipa, Bawipa” a ti i mah zawn lawng aa ruat mi kan si sual ah cun Pathian duh ning, minung duh ning in a nung mi Khrihfa ttha kan si hrimhrim lai lo.
• Bawipa nih a dam lo mi damnak a pek hna, sualnak lam a zul mi zong Pathian sin ah a phanhter tthan hna bangin Khrihfa a si mi kan nih hna zong nih mikip cungah Pathian mithmai hmu in zawnruah thiamnak le dawtnak ngei cio hna u sih.
• Nikhat vawlei cung kan nunnak a dih tik, Pathian hmai kan phanh tikah kan i kal pi khawh hnga ding mi cu a kan cawnpiak mi “Dawtnak le tthat nak dinfelnak in kan nun pi mi ” hna lawng hi an si te ko lai.
• Bawipa Pathian duh ning in a nung kho mi kan si khawh cio nak hnga ding caah Amah sin ah toidor nak lungthin he thlacam zungzal hna u sih. “That lo nak vialte chungin kan Khamh ko sawh, maw Bawipa” tiin thlacam zungzal hna u sih.