Tuahsernak in lam a kan hmuhsaktu cu Jesuh a si

Nihin cu a thiang Nili ni a si. Jesuh Khrih nih temh innak a tuar hlan zan ah a zultu hna sinah biacah a duhmi vialte hna kha tha tein a chimh dih hna. Jesuh Khrih nih biacah nak lawng siloin tuahsernak in a hmuhsak fawn hna. Abikin phun 3 in kan hmuh khawh.

Pakhat nak ah changreu le mitsur hang kha a lak hna i a thisa ah a ser hna; cun a zultu hna kha amah bangin tuah ve ding in nawl a pek hna. Nihin ni tiangin kan tuah lengmang mi Missa raithawi nak hi a si. Cucu acheu nih Bawipa zanriah ti zong in an auh (Matthew 26:26-28).

Pahnih nak ah tlangbawi (siangbawi) cannak ordination a pek hna. Jesuh Khrih nih a zultu hna kha raithawinak tuah khawhnak nawl a pek hna. Raithawi nak kan timi cu tlangbawi hna lawng nih tuah khawhnak nawl an ngeih caah a si (Leviticus 8-9).

Pathum nak ah Pathian rianthiang tuannak ah hin chimrel nak lawng siloin tuahsernak in langhter ding timi a si. Jesuh Khrih nih minung khamhnak rian a rak tuan lio ah thawngtha chimnak lawng siloin a thawngthabia chimmi a ngaitu hna an herhnak hna zong kha a tuah piak hna. “Rawl an ei lioah cun cabuai khan a tho i a puan aa chiah hnuah kut hnawhnak puan kha a lak i a tai ah aa menh i khengpi chungah ti kha a thlet i a zultu kha an ke a tawl hna i kut hnahnak puan in a hnawh hna. Kei nan saya le nan Bawipa a simi keimah nih nan ke kan tawl hna ahcun nannih zong pakhat le pakhat nan ke nan i tawlpiak awk a si. nan caah I zohchunh awk kan tuah piak cang hna: nan ca I ka tuah bantuk khan nannih zong nih nan tuah ve awk a si” (Jn 13:4-5; 14-15).

Kan nih vialte hna zong Jesuh Khrih nih dawtnak lam a kan hmuhsak cang bang khan pakhat le pakhat caah kan i nun piak awk a si.