ULH CAAN ZARHTHUMNAK

Voikhatnak Bible - Ex 20:1-17

Salm - 19:8 -11 (lehnak. Jn. 6:68 )

Voihnihnak Bible - 1Kor 1:22-25

Thawngtha bia - Jn 2:13-25

PHUNGCHIM DING AMURU

• Nihin Pathian bia kan theihmi hi luala men in ruah ding a si lo, voikhatnak Bible chungah kan theihmi kha kan vun zoh ahcun, Pathian thin a hun ter mi kan si ahcun kanmah chan lawng hmanh si lo in kan tefa chan, chanthum li tiang harnak kan tong lai, daan a kan tat lai, Pathian lung a lawmhter mi kan si ahcun chan thongkhat tiang thluachuah kan hmu lai, tiah kan hmuh. Daantat ding le thluachuahhmuh ding kha kanmah chan lawng a si ahcun aa ning deuh, a tu cu kan tefa chan tiang in kanmah sual ruang le Pathian thinhun ter ruang ah an in tuar lai ding cu ruah ah hin ruah khawh a si lo. Dingfel te kan um, Pathian lung kan lawmhter ruang ah kan tefa chan thongkhat tiang an i nuamh lai vun ruah ahcun lung a hmui tuk hringhran.
• Bawipa phunglam zulh cu a `ha i a ding, a nawlbia hi dinnak lei ah a kan hruai tu a si i hngalhthiamnak le fimnak zong a kan pe tu a si rih. Bawipa biakhiahnak cu zungzal in a ding i a hmaan zungzal fawn.
• Bawipa nih a chim mi cu, nan sualnak vialte kha vun i thenh u law lungthin thar nunnak thar in nung tuah u, a kan ti. Sualnak vialte I thenh dih, ti mi a sullam cu, a luan cia mi kan nunnak lam thluan ah kan tuah sual mi sualnak vialte kha pakhat hnu pakhat vun ruah `han in sual thlahnak hal a hau, kan sualnak caah thil`ha tuahnak le pekchanhnak, ngeih in hmailei ah kha bantuk sualnak kha tuah ti lo ding in i zuam a hau.
• Jesuh Khrih vawlei ah a ratnak sullam cu, Pathian hi zeitindah nan biak lai, Pathian duhning in biaknak cawnpiak ding ah a rak ra mi a si. Amah Jesuh hrimhrim nih khan vawlei cungah minung cannak laak in a tuahsernak in, le a chim relnak in Pathian biak ningcang kha a kan chimh. Jesuh chan in a zultu hna chan ah, zultu hna chan in pehzulh tein a tu chan tiang Thiangthlarau lam hruainak in Bupi sinah Pathian biak ningcang kha amah le a ningcang tein cawnpiak kan si. Kanmah siaremnak in Pathian cu biak khawh a si lo. Bupi nih biak ningcang a kan cawnpiak mi ningte khan biak awk a si ko.
• A tu ulh caan chungah hin kan zumhning, kan tuahser ning le kan thil ti ning vialte vun i chekhlai tuah hna u si. Hi tihin kan i chekhlai mi hi thawh`han lawmhnak caah timhtuahnak kan ngeih mi a si lai.