ULHCAAN ZARH NGANAK

Voikhatnak Bible - Jer 31:31-34

Salm - 51:3-4, 12-15 (Lehnak 51:12)

Voihnihnak Bible - Heb 5:7-9

Thawngtha Bia - Jn 12:20-33

PHUNGCHIM DING AMURU

- Ulhcaan donghnak zarh kan phan cang. Kan lonh cia mi zarh hna ah zei thil tha dah kan tuah khawh cio hna? Kan pumsa le kan thlarau nunnak ah santlai thahnem in khua kan sa hna maw... kan ulh mi (or) kan i sum mi chungin a hlu kan pek khawhmi zeital a um maw? Thilpoi ngai a um kho tawn mi cu, ulhcaan chung cu felfai ngai in I sum riangmaang i ulhcaan a dih le caang ka a ai rawlh in ei than, din than, ti mi kha a poi kho tuk mi thil a si. Mah bantuk a hmang mi kan si ahcun kan ulhcaan cu kan rawhnak caan ah a cang ko lai.

- Nihin thawngtha kan theihmi cu kan nunnak ah zulh khawh ding a har ngai mi a si. Jesuh nih a kan chimhmi ah, thlaici cu a rawh hmasa lo ahcun a thar a kho than kho lo, a kan ti. Minung ngai te nih cun Thih a tih lo mi hohmanh kan um lo, sihmanhsehlaw kan thi lai ti cu a hngal lo mi kan um fawn lo. Hi vawlei cung kan pumsa nih cun Pathian sin cu a phak ding a si fawn lo tikah ... zeitindah kan nun lai le kan um lai, ti hi faak taktak in khuaruah a hau cang.

- Bawi Jesuh a zumtu le a zultu nih cun Jesuh kalnak lam kha kan mitthlam ah a cuan peng ding a si ko. A tu ka nunchung ah hin Pathian hi faakpi in ka zumh lai i harnak zeihmanh ka tong lai lo, nuam ngai in ka tlongleng lai, tiah kan ruah sual ahcun Khrihfa tha cu kan si lem lai lo. A si hnga ding ngaingai cu, kan thlarau zungzal nunnak a hmuh nak ding caah Jesuh bantuk in temh innak ka tuar zong ah in khawhnak le tuarkhawhnak in ka tei lai, ti mi ruahchannak ngeih kha kan i timh ding a si.

- Jesuh nih a kan sawm lengmang mi cu, amah bantuk in temhinnak tuar in sunparnak hmuh ding ah a kan sawm lengmang. Asinain mithiang Paul nih cun atu kan nun lio kan intuar mi hi cu kan thih hnu vanram kan co hnga ding mi he cun tahchunh awk a tlak lo, a kan ti.