Vailam, Pathian dawtnak hmelchunhnak

“Pathian sinak kha a ngeih zungzalmi a si ko nain hramhram in Pathian tluk si awk kha cuh awkah a rel lo. Amah lungtho te tu in cu vialte cu a hlawt dih i sal sinak tu kha aa lak; Minung bantuk ah a cang i minung mui in a lang; Mi toiah aa dor i nawlngaihnak lam kha thih tiangin a zulh – vailam cung thihnak kha.Hi ruangah hin cunglei a sannak bik hmun ah khin Pathian nih a cawi i min vialte lak i min cungnung bik kha a pek; Cucaah Jesuh min upatnak caah cun vancung i a ummi vialte nih si hna seh, vawlei i a ummi si hna seh, vawlei tang i a ummi vialte nih si hna seh, an khuk an i bil lai i Pathian kan Pa sunparnak caah cun lei vialte nih Jesuh cu Bawipa a si, an ti lai.”(Filipi 2:6-8)

Pathian a si mi Jesuh nih minung cannak kha aa lak i Pa Pathian duhnak vialte kha a tuah dih. Cuticun kan nih hna zong tuah ve ding in a kan sawm i a kan cawnpiak. A kan cawnpiak mi cu “Keimah nih kan dawt hna ban tuk hin pakhat le pakhat nan i dawt awk a si” ti hi a si. Canaan khua nupi thitumnak puai ah Bawinu Mary nih sin um hna kha: “an fial mi hna paoh kha tuah u” tiah a ti hna(Jn 2:5). Jesuh nih a fial hna ning in sinum hna nih an tuah tikah Pathian sunpar nak a lang i puai a ra mi vialte hna caah lunglawmhnak a um bangin zultu hna zong nih Jesuh cungah zumhnak an ngei.

Jesuh Khrih nih Pa Pathian nawl a ngeih nak le a zulhnak cu vailam cung a thih tiangin a kan hmuhsak. Hlaan lio ah vailam cungah thahnak a ing mi hna cu misual mi hna dantatnak caah a fak bik mi le ningzahawk bik a si tiah rak ruah a si ko nain; Jesuh Khrih thawngin vailam cu kan nih Khrihfa mi hna caah “Dawtnak” hmelchunhnak ah a hung cang. Jesuh Khrih nih kan caah a intuar bangin kan nih hna zong nih midang cung kan dawtnak kan langhter nak ah hin mah duhnak thah, hlawt in Pathian cawnpiak ning in dawtnak langhter ve ding a si. dawtnak langhter khawhnak ding caah, toi dor nak lungthin ngeih a hau.

Vailam cu Pathian nih a kan dawtnak a langhternak hmelchunhnak a si bantukin kan nih Khrihfa mi hna ca zongah dawtnak hmelchuhnak kan langhter nak a si awk a si ve. Pathian duhnak a tuah i a cawnpiak nak a zul mi vialte hna cu Pathian nih an ruahnak hlei in a khamh hna i thluachuahnak zong a pek hna.