Vailamtah put buin Zulh 

“Mi nih hin vawlei pumpi hi co hmanh seh law, a nunnak a sungh ṭung ah cun zeital a miak hnga maw?”

Nihin kan theihmi thawngṭhabia chungin Jesuh nih a hnu zultu hna kha toidornak lungthin ngeih dingin a cawnpiak hna. Jesuh nih: “Ahohmanh nih zulh nan ka duh ahcun, nanmah le nanmah nan i philh i nan vailamthahnak nan i put i nan ka zulh a herh. Zeicahtiah ahohmanh, mah nunnak humhak a duhmi cu a nunnak kha a sung lai i keimah ruangah a nunnak a sungmi cu a nunnak a hmumi a si lai,” tiah a ti. Jesuh nih hi bia a chimmi hi zultu hna ca lawng ah si loin kanmah pakhat cio caah a si timi kha theih ding a si. Cucu “nunnak” kong a si. Zungzal nunnak cokhawhnak hnga ding caah mah nunnak kha Pathian caah hman hmasat ding a si. Mah hnu lawngah nunnak pek kan si lai. 

Mah duhnak i sum (vailamtahnak put) in Jesuh hnu zulh ding ah timhcia in na um kho ve cang maw? Minung kan nunnak ah hin hrial awk ṭhalo mi hmailei ton hnga dingmi harsatnak (vailamtahnak) tampi nih a kan hngah cio ko. Harsatnak cohlaan thiam le cohlaan khawh timi cu a fawi hrimhrim lomi a si. Bianabia ah zawt le dam lonak, chawva lei kong he pehtlai in lungretheihnak, chungkhar rem lonak, lung donghnak te hna, rian hmuh khawh lo  le rianṭuan khawh lo te hna, tibantuk, harsatnak tampi an um ko hna. Hibantuk thil hna hi Pathian dantatnak an si tiah kan ruat sual tawn maw? Asiloah harsatnak timi cu minung kan nunnak ah kan i nunpi chihmi hna an si ko tiin na cohlaang kho hna maw? Hi bantuk harsatnak hna nih hin Pathian he an ka naihter khaw deuh timi ṭhatnak lei in dah na cohlaan hna?

Harsatnak kan tonmi hna hi Pathian dantatnak an si tiah na ti sual, na cohlaan sual a si ah cun Pathian kha a kan hremtu le fahnak a kan pe zungzal tu sining dirhmun lawng in na hmuh ko lai. Cucu ahmaan lomi dirhmun sining in nun a si. Zeicah tiah cun “Pathian cu dawtnak a si” caah a si. A kan dawt caah a kan ser i a sermi hna kha a kan dawt caah chanbaunak tampi he kan nun lio zongah a thluachuah he a kan umpi zungzal tu Pathian a si. Amah he zungzal nunnuamhnak van ram ah um ṭi zungzal dingin a kan hruai zungzal tu le lam a kan hmuhsak zungzal tu Pathian a si. 

Minung kan si caah nganfah hrum-ainak le chambaunak tampi hna he kan nung ko men hna lai. Sihmanhsehlaw kapkhat lei in lunglawmhnak, dawtnak, daihnak, hnemhnak te hna zong kan nunnak ah hin an um ṭhan hoi. Harsat kan ton lio caan ah thluachuah (Jesuh) zong kan pawng te ah a um peng ve ko. A kan hlaw thai bal lo tu Pathian a si. Kan harsatnak (vailamtah put ṭi dingin) hrawmh ṭi pi dingin a kan fuh zungzal ko. Amah cu kan vailam kan i put lio caan ah ṭhawnnak, daihnak, hnemhnak a kan pe zungzal tu a si. Amah kha kan khawh belte a herh.

Cuasicaah kan nunnak hna kha Pathian caah hmang siang hna u sih. Kan temh innak hna kha Jesuh lungthin thiang sinah ap hna u sih law Jesuh temhinnak a rak tuar mi hma hna he khan fonh ṭi in intuar thiam i zuam hna u sih. Pawngkam ummi hna caah zeibantuk laksawng dah ka nunnak in ka pek khawh ve hna lai timi ruahnak zong ngei zungzal hna u sih. 

Harsat caan ah cun kan vailamtah pin lei tiang hmuh khawh ding hi cu a fawi hrimhrim lo. Sihmahsehlaw kan zoh zungzal ding Jesuh a um ko. Jesuh he vailam kan put ti a si ah cunt eina kan hmu zungzal ko lai.