Vancung mi bang…

Jesuh nih cun Nathanael cu amah lei i a rat kha a rak hmuh i, “Israel mi taktak a simi khi zoh hmanh u; amah khi hlenthawinak lungthin zeihmanh a ngei lomi a si,” tiah a ti.(Jn 1:47)

Kanmah le kanmah kan konglam kan i theih mi nak in Jesuh Khrih nih kan konglam a theih deuh. Zeicah tiah cun Pathian a si caah a si. Cun minung cannak aa lak i kanmah hna bangin harsatnak le fahnak hna a rak intuar ve caah a si. Kan thinlung hna zong zeitin dah zei hna nih hin dah lawmhnak a pek khawh i zei hna nih hin dah ngaihchiat nak a pek khawh timi zong a theih khawh fawn.

Jesuh Khrih nih Nathanael a thangtthatnak hi a thinlung a tthat caah a si. Thinlung ttha a ngeimi hna nih cun zeibantuk tthatnak paoh kha an cohlaan khawh. Nathanael zong mi thinlung ttha a si ruangah lam le biatak le nunnak, a hmaanmi a simi Jesuh Khrih kha a rak cohlaan khawh nak hi a si. Tthatnak cohlaan duhnak le ngamhnak kan ngeih lo a si ah cun zeitik hmanh ah kan i thleng kho lai lo. Kan caah chiatnak lawng a chauk kho fawn. Kan nunnak ah a kan remh tu hna an um a hauh bangin a kan cawnpiak tu hna cung zong ah lunglawmhnak ngeih ding a si.

Nathanael bantukin Jesuh Khrih, Pathian kan cohlaan ve a si ah cun, “Hi biatak hi kan chimh hna: Van kha aa hun i Pathian vancungmi hna cu Mi Fapa cung i an ttum le an kai kha nan hmuh lai”(Jn 1:51) tiah a ti bangin, Pathian muihmai kan sin in a lang ve lai i Jesuh bangin midang cungah tthat nak a tuah tu kan si zungzal ko hna lai.

Vancung mi hna cu a kan bawmchan tu an si bangin kan nih hna zong midang caah hmuh khawh mi vancungmi hna bangin bawmhchanhnak a pe kho tu kan si zungzal ko hna lai. Midang cungah tthatnak a tuah kho peng tu lungthin ttha a ngei kan si khawh cio nak hnga Pathian sinah thluachuah hal zungzal hna u sih.